आर'नाइ

जोंसारनि सिमां :-

लिरगिरि:- मुश्री कल्याण स्बर्गीय़ारी।

बावदा, आंगा, आरो जोंसार साथाम खुदिय़ा। साथामबो जोबोत गोसो गुदुं। बिसोर साथामबो ज’ जाब्लानो जेब्लाबो माबा नङा माबा गोदान बाथ्रा सानो आरो बिखौ मावथारनो नागिरो। दिनैबो स्कुलनिफ्राय़ फैनानै साथामबो ज’ जादों। साननै जाबाय़ जोंसारा मानिबा साननाया़व गोदोनानै दङ। मा सानदों बिय़ो।

बिनि सानहाबनाय़ महरखौ नुनानै आंगाय़ा सोंबाय़ - नोइ जोंसार माखौ सानहाबबाय़ थादों नोंलाय़, जोंनोबो बुङा मानो जोंबो सानफानो हागोन।
जोंसारा गोनो गोथो जानानै बुंबाय़ - आं मोनसे सिमां बाइदि बाथ्रा साननो लादों, आंनि जीउआव बिखौ जाफुं होनो हागोन ना हाय़ा बिखौनो आं सानगासिनो।
बाथ्राय़ालाइ मा? – बावदाय़ा सोंफिनबाय़। 
जोंसारा दसे उनाव फिन होबाय़ - बाथ्राखौ बारा गिदितबो होनजाय़ा मानोना आं जोंनि खाथिसिन जाय़गा दाबसेआव थांनो सानदों।
जोंसारनि बाथ्राखौ खोनानानै आंगाय़ा बुङालासिनो थानो हाथाराखिसै – आंगासोलै नों खाथिसिन जाय़गा दाबसेआव थांनोनो एसेबां साननांगौ नामा? नोंनि बिफाय़ा बेंकाव साख्रि मावओ, कारबो दंखाय़ो थांब्लानो जाबाय़।

जोंसारा नाथाय़ बाथ्राखौ एसेबां गोरलै होननानै सानाखै मानोना जोंसारा गोनोखोनि बिजाबखौ इसे बांसिन फराय़ो आरो बिनि बाथ्राफोरखौ इसे बांसिन बिजितना नाय़ो। जोंसारा बुंफिनबाय़ – आं थांनो नागिरनाय़ जाय़गाय़ा बे बुहुमाव नङा। जोंनि सान नखरनि खाथिसिनाव थानाय़ हाथर्खिसिम। हाथर्खिनि मुंआ प्रक्सिमा। जानगारा 4.234 सोरां बोसोर। स्रांआ मोनसे सेकेण्डाव 3 लाख किल’ मिटार खारनानै बोसोरसेआव जेसेबां खारो बिखौनो मोनसे सोरां बोसोर होननाय़ जाय़ो। स्रांआ बिबाइदि खारनानै प्रक्सिमा हाथर्खि मोनहैनो गासै 4.234 बोसोर लाय़ो। स्रांआ एसेबां गोख्रै खारनानैबो बोसोरब्रैनि बारा लाय़ो बिदिब्ला जानगारा इसेल’ होनजाय़ा बिनिखाइनो न'नि कारजों थांनाय़खौ साननो हाय़ा।
जोंसारनि बाथ्राखौ खोनानानै बावदा आरो आंगा सानैबो सोमो नांबाय़ आरो साफ्रोमबो प्रक्सिमासिम थांनाय़नि राहा दिहुननो नाजाबाय़।
साथामबो दसे गोबाव सानहाबनाय़नि उनाव आंगाय़ानो मोनसे राहा सानग्रोनानै दिहुनबाय़ आरो बुंबाय़ – आं मोनसे राहा साननानै दिहुननाय़ बाइदिब्ला जों बास ष्टेण्डसिम थांनानै गासै बाथ्राखौ सोंनाय़नो हागौ। जेरै साननाय़ एरै खामानि।

साथामबो बास ष्टेण्डसिम थांनानै कण्डाक्टरनो गासै बाथ्राखौ फारि फारि बुंबाय़।

बास ष्टेण्डनि कण्डाक्टरा बिसोरनि बाथ्राखौ खोनानानै फिन होबाय़ - फंबाय़मोन नोंसोर बिबाइदि खाथिसिन हाथर्खिसिम थांनो ओंखारनाय़ा जोबोत बाखनाय़थाव।

बिदिब्ला बाछनि भाराय़लाइ बेचेबां? बावदाय़ा सोंबाय़।

बासनि भाराय़ा उन्दै फंबाय़मोननि थाखाय़ मोनफ्रोम किल’मिटाराव 1 फैसाल’ – कण्डाक्टरा फिन होबाय़।
बावदा, आंगा आरो जोंसार साथामबो इसेल’ भाराखौ खोनानानै रंजाखांबाय़ आरो सोंफिनबाय़ – बिदिब्ला गासै भाराय़ालाय़ बेसेबां?

प्रक्सिमा हाथर्खिसिम गासै जानगारा 40,05,702.72 कौटि किल’ मिटार आरो किल’मिटाराव 1 फैसाय़ै 40,05,702.72 फैसाय़ानो जागोन नाथाय़ रां 40,057.02 कौटि जागोन।

साथामबो सोमो नांबाय़ आरो मोखांजों मोखां नाइलाय़नानै बुंलाय़नो हमबाय़ – गिदित जानानै माब्लाबा एसेबां रां बुथुमनो हानोबो हागौ!

आंगाय़ा कण्डाक्टरखौ सोंफिनबाय़ – बिदिब्ला प्रक्सिमा मोनहैनो बेसेबां सम लागोन?
कण्डाक्टरा फिन होबाय़ – जोंनि बासआ घण्टाय़ाव 80 किल’ मिटार खारो, बोसोरसेआव गासै खारो 7,00,800 किल’ मिटार, आरो प्रक्सिमा मोनहौनो सम लागोन 5,72,24,324 बोसोरनिबो बांसिन। बिसानखौ खोनानानै साथामबो बासजों थांनाय़खौनो गारनो सानबाय़।

साथामबो फावसाय़ना थाग्रा नङा। दानिय़ा थांनानै मोनहैबाय़ एय़ार प’र्टआव। एर’प्लेनजों थांथारसिगोन। थांनानैनो गासैखौबो फारि फारि सोंबाय़ आरो फिन मोनबाय़ - जोंनि एर’प्लेनआ घण्टाय़ाव 700 किल’ मिटार खारो, बोसोरसेआव गासै खारो 61,32,000 किल’ मिटार, भाराय़ा 1 किल’ मिटाराव 2 फैसा गासै रां 80114.00 कौटि आरो प्रक्सिमा मोनहौनो सम लागोन 65,32,457 बोसोरनिबो बांसिन।

साथामबो एर’प्लेनजों थांनानैबो एसेबां बोसोर सम लानाय़खौ जोबोत साननांगौ जाबाय़ मानोना जोंनि जीउआ 100 बोसोरल’ जानो हागौ।

साथामबो जेबो राहा मोनैआव दानिय़ा रकेटजों थांनो सानथारबाय़। रकेट थिलिआव थांनानै बिसोरनि साननाय़खौ गासैखौबो फारि फारि बुंफिनबाय़।
रकेटनि मानसिय़ा बिसोरनि बाथ्राखौ खोनानानै फिन होबाय़ – फंबाय़मोन नोंसोर रकेटजों थांनो नाजानाय़ा थार जादों, मानोना अख्रांमाय़ाव रकेटजोंसो बिरनो हाय़ो आरो बांसिन खारनो हाय़ो। जोंनि रकेटआ घण्टाय़ावनो 30,000 किल’ मिटार खारो, बोसोरसेआव गासै खारो 26,28,00,000 किल’ मिटार, भाराय़ा 1 किल’ मिटाराव 3 फैसाय़ै गासै रां 120171.00 कौटि आरो प्रक्सिमा मोनहौनो सम लागोन 1,52,424 बोसोर।
साथामबो रकेटजों थांनानैबो एसेबां बोसोर सम लानाय़खौ खोनानानै सोमो नांबाय़।
बावदा – बिदिब्ला जों जोंनि जीउआव प्रक्सिमासिम थांनो हाथारनाय़ नङा नामा?
आंगा – मानो हाय़ा जानो, हुबाय़ थाब्ला अन्थाय़ाबो जामो, जोंबो नाजाबाय़ थागोन।
जोंसार – नों थार बाथ्रा बुंदों आंगा। जों गोसो जाब्ला दानो प्रक्सिमासिम थांना मोनहैनो हागौ।
आंगा आरो बावदा जोंसारनि सोमो नांथाव बाथ्राखौ खोनानानै सोंफिनबाय़ – माबोरोइ?
जोंसार – आं नंखाय़ बुङाखै, जों जानसिननिख्रुइ जानसिन गोजानाव दसेनो मोनहैनो हानाय़ साबसिन राहाय़ा जाबाय़ गोसो। जों गोसोजों प्रक्सिमासिम थांदोनि थु।
साथामबो होख्रावनानै बुंबाय़ थु बिदिब्ला दानो प्रक्सिमाय़ाव क्रिकेट गेलेहैनि।