आर'नाइ

सेमिकण्डाक्टर:-

लिरगिरि:- मुश्री कल्याण स्बर्गीय़ारी।

      जोंनि जीउआव बांसिन जाय़गा मोननाय़ गोनोखोनि बेसाता मा होननानै सोङोब्ला, फिननाय़ाव आं बुंगोन “सेमिकण्डाक्टर”। सोरनिबा थाखाय़ बिय़ो जेबो नङाबो जानो हागौ नाथाय़ सेमिकण्डाक्टरा जोंनि सानफ्रोमबोनि जीउनि गोबां समावनो जोंखौ हेफाजाब होय़ो आरो बिनि थाखाय़सो जोंनि जीउ लामाय़ा गोजोन जाय़ो।

      1947 माय़थाइआव ज’न बारडीन आरो वालटार ब्रेटेइन मुंनि सानै गोनोखोआरीय़ा सेमिकण्डाक्टरखौ थाखोसे दाउगा होनानै ट्रेनजिष्टर सोमजि होदोंमोन। दिनैनि मुलुगाव मानसिय़ा जेसेबां जौगादों होननानै देतगानो हादों बिनि गुबैआनो जाबाय़ ट्रेनजिष्टर। ट्रेनजिष्टरा दिनै ट्रेनजिष्टरल’ जानानै थाय़ाखै, बिय़ो बाइदि रोखोमै जौगानानै एस-सि-आर, ट्राइएक्ट्, एफ-इ-टि, फत’-ट्रेनजिष्टर बाइदि गुबै महर लानाइनि अनगाय़ैबो गोबां बाहागोआव जौगाबावबाय़। बि गासैनिगो गुबैय़ा नाथाय़ सेमिकण्डाक्टर।

      सेमिकण्डाक्टरा मोनसेल’ नङा। जारमेनिय़ाम आरो सिलिकन मुंनि मोननै गिबि मुवाखौ दासान्दै साबसिन बाहाय़जानाइ सेमिकण्डाक्टर महरै गनाय़नाइ जादों। जारमेनिय़ाम आरो सिलिकन मोननैबो खनि मुवा। बिखौ हाजों नांदेरना थानाय़ समाव मोननाय़ जाय़ो। मोनजेननाय़ समाव जारमेनिय़ाम आरो सिलिकना जेब्लाबो मोब्लिबनि दाबोहैथि मुवा। बिसोरनि ज’थाइ बिसाना 4, बिनिखाइनो बिसोरनि मोनफ्रोम एट’मा जेब्लाबो मोनब्रै मोनब्रै एट’मजों नांथाबनानै थाय़ो।

      सेमिकण्डाक्टरखौ ज’थाइ बिसान 5 गोनां मुवा जेरै आर्सेनिकजों ड’पिं खालामब्ला अदेबानि सेमिकण्डाक्टरजों आर्सेनिक नांदेर होब्ला मोनफ्रोम आर्सेनिक एट’मनि मोनसे इलेक्ट्र’न बारा जायो आरो बि बारा जानाय़ इलेक्ट्र’ना रावजोंबो नांथाबना थाय़ा आरो उदां इलेक्ट्र’न जानानै थाय़ो। आर्सेनिकजों ड’पिं खालामनाय़ मोनसे सेमिकण्डाक्टराव गोबां उदां इलेक्ट्र’न थानाय़खाइनो बिनि गेजेरजों गोर्लैय़ैनो इलेक्ट्र’न खारनो हाय़ो। बिबाइदि ड’पिं खालामनानै मोननाय़ मुवाखौ एन-टाइप मुवा होननाय़ जाय़ो। बि मुवाय़ाव जेब्लाबो बारा इलेक्ट्र’न थानाय़खाइनो बिय़ो जेब्लाबो निगेटिभ सार्ज गोनां मुवा जानानै थाय़ो।

      सेमिकण्डाक्टरखौ ज’थाइ बिसान 3 गोनां मुवा जेरै इन्दिय़ामजों ड’पिं खालामब्ला अदेबानि सेमिकण्डाक्टरजों इन्दिय़ाम नांदेर होब्ला सेमिकण्डाक्टरनि मोनब्रैजों गोरबनो थाखाय़ मोनसे आंखाल जाय़ो। बि आंखाल जानाय़ जाय़गाय़ा जेब्लाबो लांदां जानानै थाय़ो। मोनफेरोम लांदां जाय़गाय़ा जेब्लाबो उदां आरो पजिटिभ धोरोमनि खामानि मावओ। इन्दिय़ामजों ड’पिं खालामनाय़ सेमिकण्डाक्टरखौ पि-टाइप मुवा होननाय़ जाय़ो आरो गोबां उदां लांदां थानाय़खाइनो बिनि गेजेरजों गोर्लैय़ैनो मोब्लिब खारनो हाय़ो।

      एन-टाइप आरो पि-टाइप मुवाखौ बाइदि रोखोमै ज’थाइनानै बाइदि इलेक्ट्र’निक बाहागो जेरै डाय़’ड, ट्रेनजिष्टरखौ सोमजि होनाय़ जाय़ो। बिनो इलेक्ट्र’निकनि गुबै आरो गासैनिबो गुबैआ जाबाय़ सेमिकण्डाक्टर।    

* * * * * *