आर'नाइ

पेरिस्क'प:-

लिरगिरि:- मुश्री कल्याण स्बर्गीय़ारी।

      गोनोखो सोलोंनाय़ समाव उसुगुदु गोसोखौ सुग्लाइ होनो थाखाय़ गोर्लैय़ै गावनो बानाइनो हानाय़ मोनसे जोथोना जाबाय़ “पेरिस्क’प”(Periscope)। बिखौ बानाइनो थाखाय़ मोनसे गोलाव बाक्सु लानो हागौ एबा फिसाय़ै बानाइनोब्ला खामानिखौ जाफुंहोनो थाखाइल’ मोदोमफ्रु गनसा(Incense stick) जथाइग्रा(Packet) लानो हागौ। इसे गिदित नाइनानै लानो हाब्ला मोजां।

      सावगारिआव होनाय़ बाइदि गंनै मोखां नाइग्रा आय़नाखौ फिसा बाक्सुआव रोजोबै हावनाइ बाइदि 45 डिग्री खनाय़ै फजनांगौ। आय़ना गंनैखौ गोजा गाबजों दिन्थिनाय़ जादों। जोंनि मेगनाव नुजाथिनो गोनां जाय़गानि नुथाय़ा (Scene) सिगां गोजौनि आय़नाय़ाव गोग्लैय़ो, बि नुथाय़ा रिफिनानै गाहाइनि आय़नासिम थाङो, गाहाइनि आय़नानि रिफिनाय़ा जोंनि मेगनाव गोग्लैय़ो, अब्लानो जों नुनो मोनो। जों बिबाइदि नुनो मोननाय़ नुथाय़ा थोंजों नुनो मोननाय़ नुथाय़ नङा, बिय़ो रिफिनाय़ नुथाय़सो। जों बिबाइदि गावनो बानाइनाय़ पेरिस्क’प बाहाइनानै गोजौ बेरानि आन्दोआव थानानैबो साजों नाहरनो हागौ। दै सिंजों खारनाय़ साबमेरिन सिंनिफ्राय़ दैनि साखौ नाइहरनो थाखाय़बो पेरिस्क’प बाहाइनाय़ जाय़ो।

      फराय़सा फोरा पेरिस्क’पखौ खेबसेबाबो गावनो बानाइनांगौ। बानाइनाय़ खामानिय़ाव बैसो गोरा फोरा हेफाजाब होनांगौ।