<लितगिरि-मुश्री कल्याण स्बर्गीयारी, लितगिरिआ गोनोखोगिरि नङा एबा गोनोखोनि मानसिबो नङा नाथाय गोनोखोनि बाथ्रायाव गोसो होग्रा आरो बिखौ लितनानै मोजां मोनग्रा मानसि। बेयाव गोनोखोनि गोब्राब बाथ्राखौ लितनो लायाखै, गोनोखोजों लोब्बा गैयै मानसियाबो फरायनानै इसे सुलु मोननो हानाय बाइदियैसो लितनाय जादों। गुबुन लितगिरिआ बिखौ साबसिन खालामनो थाखाइ लितबावनो सानोब्ला लितनो हागोन>
आगोलाव मानसिया सान अखाफोरखौ मोदाय होननानै सानोमोन नाथाय दा बिबाइदि साननाया जोबनो हमबाय। दासिमबो नाथाय गोबां मानसियानो जोंनि मुलुगखौ आनानगसाइआनो सोर्जिदोंमोन होनना सानो। गासै मुलुगखौ मिथिनो थाखाय गोनोखोगिरिफोरा जेब्लाबो नाजाबोदों। मुलुगखौ मिथिनो लुबैनाय हाबिला आरो नारानाथा नांथाबनाय गोसोनि गोनोखोगिरिफोरनि नाजानायाव दिनैसिम मुलुगनि गोबां बाथ्रा मिथिनो मोनबाय। गेलिलिअ बाइदि गोनोखोगिरिआ सान नङा बुहुमासो गिदिङो होननानै बुथारजानांगौ जादोंमोन, थेवबो गोनोखोगिरिया नांथाबनो गाराखै आरो जेब्लाबो सैथोखौ फसंबोदों। गोनोखोनि राहाजों मुलुगखौ मिथिनो नाजानाय बि बाहागोखौ एसट्र’नमि होननाय जायो। एसट्र’नमिआ दिनै गोबां दाउगाबाय आरो मुलुगखौ सोर सोर्जिदोंमोन बिखौबो नागिरना दिहुनबाय।
|
मुलुगनि सोर्जिगिरिआ सोर बिखौ मिथिनाइनि सिगाङावनो जों ब्लेक ह’लखौ मिथिनांगोन। जों जेब्लाबो हाथर्खिफोरखौ जोंख्लाबबाइ थायो होनना मिथिगौ। नाथाय गोबां हाथर्खि दं बिफोर जोंख्लाबनायखौ गारदो बिफोरनिफ्राय स्रांबो ओंखारा। बिफोर जेब्लाबो गोसोम एबा खोमसि हाथर्खि। बिबाइदि खोमसि हाथर्खिखौ ब्लेक ह’ल होननाय जायो। ब्लेक ह’ल हाथर्खिफोरा जेब्लाबो नुनो मोननाय हाथर्खिफोरनिख्रुइ जोबोत देतसिन। बिफोरनि मोदोम एबा भरनि रोजाथिय़ा जोबोत बारा आरो बिनि बोखथाबनो हानाय गोहोआबो जोबोत बारा। बाराद्राय बोखथाबनाय गोहोनि थाखाइनो बिनि मोदोमनिफ्राइ स्रांनि गुथालखौबो बोखथाबनानै ओंखारनो होआ एबा गुबुन हाथर्खिनिफ्राय फैनाय स्रांखौबो बोखथाबनानै रिफिनो होआ आरो बिनिखाइनो बियो गोसोम हाथर्खि एबा नुनो मोनै हाथर्खि एबा ब्लेक ह’ल। ब्लेक ह’लखौ दुरबिनजोंबो नुनो मोनैनि थाखाय हाथर्खिफोरनि दिदोमथिखौ बिजितनायाव गोनोखोगिरिफोरा गोबां गुलाइ गुजाइ मोननांगौ जादोंमोन आरो थारखौ मिथिनायाव गोबां सम फावसायना थानांगौ जादोंमोन।
बि लामायाव साबसिन दाउगानानै गोख्रों आरो दिदोम बिबुंथि होनो हानाय मानसिया जाबाय ष्टिफेन हकिं। बिथांनि बाइदिब्ला जों मेगनजों एबा दुरबिनजोंबो नुनो मोनाब्लाबो ब्लेक ह’ल हाथर्खि दङ। दानि मुलुगनि जोनोमनि सिगाङाव गासै मुलुगाव गोहोजों बुंफबनानै थानाय ब्लेक ह’लसो दङमोन, दानिबाइदि ग्रह हाथर्खिफोर गैयामोन। मोनसे समाव ब्लेक ह’ल हाथर्खिफोरा बेरफ्रुदोंमोन आरो बेसेबा गोजानसिम गोसारनानै मुलुगाव गोबां ग्रह हाथर्खिनि जोनोम जादोंमोन। गोबां गोनोखोगिरिआ नाथाय ष्टिफेन हकिंनि बि थाथाइजों गोरोबनो हायाखैमोन, थेवबो ष्टिफेन हकिंआ गावनि थाथायाव दिदोम थादोंमोन। बिथांनि बिजितनायाव बिखौबो बुंनाय जायोदि ब्लेक ह’लाव समनि जेबो ओंथि थाया। आनानगसाइआ मुलुगखौ मोनसेनि उनाव मोनसे सोर्जिदोंमोन होनना बुंनाय जाय़ो जेरै सान, हाथर्खि, मानसि, मोसौ, दंफां बाइदि बाइदि, नाथाय बै समाव मुलुगाव ब्लेक ह’लल’ दङमोन आरो सम गैयामोन बिदिब्ला आनानगसाइआ मुलुगखौ मोनसेनि उनाव मोनसे माबोरोइ सोर्जिनो। आनानगसाइआ मुलुगखौ सोर्जिदोंमोन होनना साननाय एबा मानिनाया नाथाय गावबागाव बाथ्रा। |
ष्टिफेन हकिंनि ब्लेक ह’लनि बिबुंथिया बारा सम आन्दोआव थानांगौ जाय़ाखिसै। सन्द्र मुंनि रेडिअ’ टेलिस्क’पखौ सेटेलाइटसिम लांनानै बिनिफ्राइ बाहायनो लानानैसो नुनो मोनबायदि ष्टिफेन हकिंआ बुनाय बाइदि थि जायगायाव ब्लेक ह’ल होनना बुंनाय हाथर्खिया दंमारो। बिनि उनावनो ष्टिफेन हकिंनि गोबां बाथ्राखौनो गनायजाथाव होनना साननायनि लोगोसे मुलुग जोनोम जानाय़नि आन्दोनि बाथ्राया स्रां जाखाङो।
मुलुग जोनोमनि बाथ्राया नाथाय एसेआवनो थाल्ला स्रां जायाखै। ब्लेक ह’ल बेरफ्रुनाय बाथ्राखौ गनायना लाब्लाबो बियो मानो बेरफ्रुनांगौ जाखो बियो साननांगौ जानानै थायो। गोबां गोनोखोगिरिआ बि बाथ्रानि फैसालिखौ बेखेवनो नाजाबाय थायो। उनाव हिग्स आरो बच्छन मुङै मिथिजानाय सानै गोनोखोगिरिआ ब्लेक ह’ला मानो बेरफ्रुनांगौ जाखो बिनि जाहोनखौ बिजितनानै दिहुनो। बिथांमोना बिजितनानै बेसातनि गेजेराव थानाय मोनसे गोदान फिसासिन बाहागो नागिरना मोनो बि बाहागोनि मुंखौ उनाव हिग्स-बच्छन दोननाय जायो। बि हिग्स-बच्छन बाहागोआ ओरोइनो जेबो खामानि मावआ नाथाइ जेब्ला सांग्रां जाखाङो रोजोबै नांनानै थानाय गोबां मुवानि गेजेराव सौग्रावहोनानै बिसोरखौ बेरफ्रु होनो हागौ। ब्लेक ह’ल बेरफ्रुनाय जाहोनाबो बिनो एबा हिग्स-बच्छन बाहागोनि थाखाइनो ब्लेक ह’ला सानसे बेरफ्रुदोंमोन होननानै साननाय जायो। बिदिनो जों बुंनो हागौ हिग्स-बच्छन बाहागोनि थाखाइनो मोनसे समाव मुलुगनि जोनोम जादोंमोन। बिनिखाइनो गोनोखोगिरिफोरनि बाइदिब्ला हिग्स-बच्छन बाहागोखौनो मुलुगनि सोर्जिगिरि एबा आनानगसाइ होनना साननो हागौ।
|
