इण्डाकचन कुकार
गोनोखोनि सोर्जिनाय़ आरो इचिंआव जाय़गा लानाय़ मोनचे जोथोना इण्डाकचन कुकार (Induction Cooker)। जों मिथिगौ अरजोंचो सावनो एबा गुदुं जाहोनो हागौ। आगोलनिफ्राय़ बाहाय़बोनाय़ इलेक्ट्रिक हिताराव मोनचे तारुं फाय़खननाय़नि(Coil) गेजेरजों मोब्लिब खारहोनानै बि कइलखौ गुदुं जाहोनाय़ जाय़ो। कइलनि दुंनाय़ाव खान्था चाराइआबो दुंफाय़ो। बि सोलोआव बारा मिथिनांगौ गैय़ा। इण्डाकचन कुकाराव नाथाय़ जेबो दुंनाय़ जोथोन गैय़ा। जेबो दुंनाय़ जोथोन गैय़ालाचिनो खान्था चाराइआलाय़ माबोरोइ दुंलाइखो बिय़ो साननांगौ बाथ्रा।
मोनचे कइला मावफुंनो हानाय़ खामानिखौ जों इण्डाकचन होननो हागौ। इण्डाकचन कुकाराव गुबैय़ै कइल बाहाय़नाय़ जाय़ोखाइनो बिखौ इण्डाकचन कुकार होननाय़ जाय़ो। कइलखौ हितारावबो बाहाय़ो, बिय़ाव कइलनि दुंनाय़खौल’ बाहाय़नाय़ जाय़ो नाथाय़ इण्डाकचन कुकाराव कइलनि एडि कारेण्ट(Eddy current) सोलोखौचो बाहाय़नाय़ जाय़ो।
एडि कारेण्ट होनब्लानो आगोलाव कइलाव जानाय़ मोब्लिबनि मोनचे खहा(Loss) होननानैचो साननाय़ जाय़ोमोन। जों मिथिगौ मोब्लिबजों जाहोनाय़ खामानिफोराव एबा जोथोनफोरा दचे उनावनो गुदुं जाखाङो। मोनचे टिभि, डेक, कम्पिउटार बाइदिय़ाव गुदुं जाहोनाय़ा जोंनि थांखि नङा। बिफोराव जों नागिराब्लाबो मोब्लिब गोहोआ गुदुं गोहोचिम सोलाय़गारो। मोब्लिब गोहो जोबगारनानै गुदुं जागारनाय़खाय़नो बिखौ जों जेब्लाबो मोनचे खहा होननांगोन।
दानिय़ा जों मिथिनो हागौ एडि कारेण्ट माबोरोइ जागाय़ो। मोब्लिबजों खामानि मावनाय़ समाव बाइदिचिना जोथोननि गेजेरजों मोब्लिब खारहोनांगौ जाय़ो। बिबाइदि मोब्लिब खारनाय़ाव गोबां बोखथाबारी (Magnetic) गोहो जागाय़ो। बि बोखथाबारी गोहोनि थाखाय़नो लोगोचे थाफानाय़ ल’हानि(Iron) खोन्दोफोराबो मोब्लिबनि बोखथाबारी गोहोनि लोगोचे गावनि मोदोमावबो मोब्लिब जागाय़ो। जों नागिराब्लाबो बिबाइदि जागाय़नानै ल’हानि मोदोमाव खारनाय़ मोब्लिबा ल’हानि मोदोमखौ गुदुं जागारहोय़ो। जों जाजानो लुगैय़ै बि खहाखौनो दानिय़ा इण्डाकचन कुकाराव बाहाय़नाय़ जाय़ो।
इण्डाकचन कुकारनि चिङाव जेब्लाबो खद्राबाइदि फाइखननाय़ मोनचे कइल थाय़ो। बि फाइखननाय़ कइलनि तारुंजों मोब्लिब खारहोब्ला गोहो गोनां बोखथाबग्रा जाखाङो। गुबुंय़ै फाइखननाय़ कइलनिफ्राय़ गोबां बोखथाबग्रानि मेरु एबा खर’ जाखांनाय़ा संग्रा आइजेंनि मोदोमाव गोबां पजिटिभ आरो निगेटिभ खर’ जाखांहोय़ो। मोनफ्रोम पजिटिभ खर’निफ्राय़ निगेटिभ खर’चिम मोब्लिब खारनो हमनाय़ाव आइजेंनि मोदोमा हारचिंनो गुदुं जानो हमो। बिबाइदि दुंनाय़ आइजेंआव थानाय़ जानाय़ लोंनाय़ बेचाताबो दुंफानो हमो।
मिथिनो गोनांदि बाहाय़नाय़ आइजेंआ जेब्लाबो ष्टिल एबा ल’हानि जानांगोन। फाइबार, प्लाष्टिक बाइदिय़ा गुदुं जानो रोङा मानोना बिय़ाव बोखथाबग्रानि गोहोम गोलैय़ा।
बोखथाबग्राजों गाज्रि जानो हानाय़ जेरै ए-टि-एम कार्डखौ इण्डाकचन कुकारनि खाथिय़ाव लांनाङा।
|
