बारनि गेजेरजों शोदोबा खारनो सम लायो। जों मिथिगौ बारनि गेजेरजों शोदोबा 343Mtr/Sec. खारो। 1 मितार गोजाननि शोदोबखौ खोनानो जों 3 मिलिसेकेन्द सम लाफ्रामो। जाइखि जाया शोदोबखौ जों खोनानो जेब्लाबो दसे सम लायो। थाल्ला बुंनांगौब्ला शोदोबखौ जों उनावसो खोनायो।
जायखि जाया बिजों गैयाब्ला गुथाल सोमजिनाय बाथ्राखौ जों साननो हाया। शोदोबनि बिजोंआ बार, नाथाय स्रांनि एबा रेडिव’ गुथालनि बिजोंआ मा बिखौ दिनैसिम गोनोखोगिरि फोरा मिथिनो हायाखै। सानना लानाइ जाथ’दों बियो इथार(Ether)। स्रां एबा रेडिव’ गुथाला इथारनि गेजेरजों एबा बिजोंजों मोनफ्रोम सेकेन्दाव 3 लाख कि:मि: खारो। जोबोत गोख्रोइ खारनाइखाइनो माखौबा नुनायाव सम लायो होनना जों मिथिस्लाबनो हाया। इसेब्लाबो नुनायावबो सम लायो। शोदोबखौ जों जेरै उनावसो खोनायो नुनायखौबो जों उनावसो नुयो।
गोनोखोगिरिफोरा बुंबोदों स्रांनिख्रुइ गोख्रोइसिन खारोब्ला समआ उल्था खारो। बिदिनो जों आगोलनि डाइन’सर फोरखौ दाबो नुफिननो हागौ। थारैनो समआ उल्था खारो नामा? समआ जेब्लाबो उल्था खारनो हाया, बियो थार। जों मिथिखागौ आगोलावनो जालांनाइखौसो जेब्लाबो खोनायो एबा नुयो। बिदिब्ला आगोलनि डाइन’सर नुनो मोननाया जेबो गिदित बाथ्रा नङा।
जों मोनसे शोदोब गोबावसिनै खोनानांगौब्ला बांसिन जानगाराव थानांगोन। बिदिनो गोबावसिनै नुनांगौब्ला जों बेसेबांबा गोजानसिनाव थानांगोन।
गोनोखोगिरिफोरा मुलुगबिखायाव दासिमबो बेसेबांबा गिथाव हाथरखिनि बेरफ्रुनाइ नुनो मोनो। बि जाथाया नाथाइ दा जायाखै, दिनैनिफ्राइ बेसेबांबा लाख बोसोर सिगां जालांनाइसो। बिनि स्रांआ मोनफ्रोम सेकेन्दाव 3 लाख कि:मि: खारनानै दिनैसो बुहुम सफैदों, बिनिखाइनो जों दिनैसो नुनो मोनदों। बिबाइदियैनो बेसेबांबा गोजानाव थानाइ हाथरखिनिफ्राइ जोंनि बुहुमनि आगोलनि डाइन’सरखौबो नुनो हागौ।
जों डाइन’सर नाइनांगौब्ला, स्रांनिख्रुइ बेसेबांबा गोख्रोइसिन खारनानै, डाइन’सरनि महर रोगानाइ स्रांआ मोनहैनाइनि सिगांनो बेसेबांबा गोजाननि हाथरखिआव थांना थाहैनांगोन। बि बाथ्राखौ जों मिथिनो हागौ नाथाइ थारै मावनाया जोबोत गोब्राब।
