आर'नाइ

मुश्री रन्जय ब्रह्म

आमटेका दैसा

आमटेकाया नैजि जौथाइनि हादान
1965 मायथायाव एवस्रांजानाय
मोनसे भुटाननि आफाङाव थानाय अरनमोन
दै अखा हान्था-मेलानि बेयाव टेकामोन

बोसोरनि उनाव बोसोरसिम
बेयाव दिनैबो दैसा बोहैदोँ
दैसानि मुङा आमटेका
दैज्लां मेसेँ मेँनाय गैयै
अराय सान हर बोहैदोँ बियो
नाथाय लासै लासै हामलांसिनदोँ

जमनागुरि कझगुरि गामिनिफ्राय
जिरि जिरि दुब्लि गेजेर गेजेर
सिमलगुरि दैबोरबिलि गामिनि सेरजोँ
बियो बोहैदोँ आरो बोहैदोँ

सानिफ्राय जानानै आमटेका हाथाइनि सोनाबजोँ
बियो अराय बोहैदोँ खोला मोखांजोँ
गावनि सुखु-दुखुजोँ बुजिस' हायै

दुगैनाय सि-सुनाय सुबुं जिबिनो
बे दैसायानो अराय हुंखा सुंबोदोँ
अरायसम थाबाय थागोन ना थाया?
बेखौ बुंनो हागोन हाया मोनो

आय' जोँ उन्दै समाव
बेवहायनो गेलेदोँमोन
बेवहायनो बाथा होना ना बोन्दोँमोन
दैज्लां फैब्ला बेवहायनो
बादुवा गेलेदोँमोन सानस्रिदोँमोन
मेसेँआव जाबथु लायै लायै
अन्थाइ जोथ्रोद जोथ्रोद ना गावदोँमोन

गोदो बेवहाय दंमोन
साम' खांख्राय नाथुर
नास्राय गोरै बामि फिथिख्रि
खना खना खुसिया जिबौ दन्दा

मानसिनि उदैया अरबाय
गैलिया हालि हालि एलेँगा
फालो फालो थेँगोना ना बाला खावा
गोनोखोआ लासै लासै फोजोब्बाय
बिष आरो कारेन्टजोँ ना हमबाय

बेयाव दा जेखायजोँ मोनलिया
आस्रा जे गन्थामाराजोँ मोनलिया
बै समनि मोनास्रि सनास्रि
मादै बिबारिमोना ना गुरलिया

बेयाव खोस्लिफाना बिबार बारलिया
एम्बु थेरेमोना थब्ल'लाय नुजालाय
सिख्लाफोर दुगैनायखौ नायखोमालिया

बेयाव दिनै सिब्रु मान्दे इलांसि
थाराय आजोनाय मैगं रज'लिया
अन्थाइ अन्थाइ बादामालिया गोबाना गैलिया

जेत आसार सावोननि अखाजोँ
दिनै हुलुं-हुथुं दै-बाना जालिया
आबाद दुब्लिखौबो सौखालिया
खांख्राय फालुवाना गैलिया बेवहाय
निजोरा निजिरि सुलुं गैलिया

दाउब' हादिदग्ला
फानखावरि हांसो सिलारिया
बेवहाय गेलेफैलिया दिनै
आयं थबगांनि हांसो राजाया
बे दैसाखौ गोसोखांलिया दिनै

आय' जारिमिना आंखौ सोगाबो
दैसा नोँ गोमालांगोन नामा?
नङाब्ला मानोथो रानलांनो हमदोँ
नोँ दिनै साम' खांख्रायखौ गोबालिया
एलेँगा फिथिख्रिमोनखौ गोबालिया

आय' आमटेका दुखु फैयो
नोँनि बिखायावनो खन्थाइ लिरोमोन
सान हर साम' बोराया
नोँनि गोरबोआव ना खान्दामोना
अन्थाइ अन्थाइ आमाय जुमाय गेलेयोमोन

बैसागुआ फैयोब्ला गोदान देलाइस्रि महरै
नोँनि समायनाजोँनो
नोँनि मुंजोँनो
आबै आबौआबो मेथाइ रोजाबोमोन

आय' गारबोनाय समनि बिसम्बिफोरासो
होँगो-दोँगो जाखांफैयो आंनि
आं गोसो खाङा खाङा नंथारब्लाबो

फुंआवनो जेखाय लानानै
बेलासि बेलासि खबाय बुंजाफा
दैसानिफ्राय ना गुरना लाबोयोमोन आयआ

आब' सनजिमा रनजिमामोना
बेवहायनो दुगैसे दुगैनानैबो
दखना कम्बलखौ सुना लाबोयोमोन

खदाल लायै लायै
बेवहायनो खांख्राय खुसिया जावहैयोमोन
आदा बेरला आरो आफामोना

गुरब्लां अनलामोना
बेवहायनो आस्रा जे लानानै
बाथाजोँ फासियाल बोरसिजोँ
खबाय बुंलायबोयोमोन

आंहा गोसोआव फैयो आय'
बेवहायनो दाबाथि थिँग्रिँमोना
खांख्राय खेबजाना गाबख्रावलायनाय
निला निमा आनावमोना
बेलाव खानाजोँ आदैयाव बाजाना गाबनाय
मागुराम रुगुंमोना बेवहायनो
जिबौ दन्दाखौ गिना न'सिम खारबोदोँमोन!!

* * * * * * *

नायगौमोनहां
-----------------------
गामियाव संसार जानानै दिनैसिम रोजासेफ्राम बर'नि सावथुनखौ नायदोँब्लाबो
फ्लिम सुथिँ खालामनाय नुफेरथाराखै रजे बिमाया।
"माबालायनो गिदिर गिदिर केमेराजोँ हायाव सुंथालायनानै खेबोनो।
फिदिँ फिदिँ खेबोनो।"
बेयो जाबाय रजे बिमानि सोरनिफ्रायबा खोनानानै गोसोआव गो लानाय।

"मादै--- मादै, हंला हाथाइयाव कक्राझारनि फ्लिम सुथिँ खालामफैदोँ।
समायना एक्ट्रिसबो फैदोँ।
नोगोद देलाइखादोँ समायना एक्ट्रिसआ।"
गामिनि रुम्बांआ रजे बिमा मैगं लेमबाय थानाय समाव खिन्थाफैदोँमोन।
जै खोनादोँबो मैगं हानायखौनो दोन्नानै हाखु-दाखु साइकेल सालायलांदोँ रजे
बिमाया नायनो।
ननिफ्राय हंला हाथाइसिम रजेमोननि न'आ नै किल' मिटार जायो।
गोख्रैनो सालायनायाव खेबनै साइकेल सेना गगुलायदोँ, थेवबो गोख्रैनो
सोफिननो हादोँमोन रजे बिमाया।
थांनानै एसे गोजाननिफ्राय रजे बिमाया बलेर'खौ दर्जा ख्रे फांनाय नुदोँ।
खाथियाव मोनहैथारबा--- नै बुं खारलांबाय।
हंला हाथाइयाव फैनाय मानसिफोरा गल' गल' नायहरदोँ।

---> रन्जय ब्रह्म

* * * * * * * * *

मुश्री रन्जय ब्रह्म

जिबिखा

नोङो खारखोमा लांबाय लोगो
जोँखौ नागार लांबाय नोङो
मिथिया जाहोनखौ दिनैसिमबो
नोङो लाइजाम गांसेबो होलाङाखै जोँनो

आं गोसो खाङो दिनै
नोँनि खारखोमानायनि जाहोन नागिरनानै
नाथाय आंनि गोरबोआव मोदै बोहैयो
जेन' निजोरानिसो गोगो दै

नोँनि दुखुखौ जोँ नुवामोन
नोङो खुसियै रायज्लायो सावरायोमोन
नोँनि फेस्लियाबो एसेल' नङामोन
नोङो गोरबो गोथौ गियानिमोन

नाथाय मानो खारखोमाखो जिबि?
लोगो नोङो मानो खारखोमाखो?
बिनि फिन्नायखौ नोङो होआखै
नोङो लाइजाम गांसेबो लिरलाङाखै

नोँनि खुसिनि महर मुस्रिया
दाबो जाखांफैयो
नोँनि रायज्लायनाय रायदावनायफोरा
दाबो रिँखांफैयो

जोँ बावनो हायाखै लोगो
हाथाइ सेरनि थाइजौ सायायाव
लादु मेथाइ जालायनायखौ
नोँनि जोलुर जोनाय
नोँनि काबादि गेलेना
बाखोनाय जालायजासे देरहानायखौ

नोँ बहा थांखो जिबि
नोङो जोँखौ मानो नागारलांखो?
दाबो सावगारि दं नोँनि
गुवाहाटि इक'लेण्ड कलाकेत्र
आरो काजिरंङा जुनारसालियाव सेबखांनायफोरा

नोँ बेसेबांबा खुसिमोन जिबि
नोँ जोबोद खुसिथारमोन
गुवाहाटियाव थांगोन हराव
GKB Academyयाव जोँ दाइल'ग होलायदोँमोन
सुरिडार गान्ना फ्रिन्सिफालखौ लाजिलायना
नोङो दखना गानफिनलायदोँमोन

नोँ बहा थांखो लोगो
मानो थांनांगौ जाखो?
नोँ जेबो फिन्नायखौ होआखै
नोङो लाइजाम गांसेबो लिराखै

जोबोद दुखुजोँ आयंमोना
नोँनि आदामोना
गाबै गाबै खौरां हरदोँमोन जोँनो
नोँनि गोथै महरखौ नायनानै
जोँ बेसेबा गाबहैदोँमोन

नोँ बहा थांखो जिबि?
नोँनि गोथौ हाखराव बिबार होनानै
मेथाइ रोजाब रोजाबै
आखि आखायजोँ जोँ नोँनि सह'खौ फबहरदोँमोन

नोँनि गोथै हाखराव आंनि मोदैयाबो
थरथिँ थरथिँ गसरदोँमोन
नोँ जोँखौ नागारलांबाय लोगो

आयं आरो आदाया नुदोँ
नोङो गिलु-बालु बिस लोँदोँ
बिस लोँनानैनो नोङो ओँखाम खुरदोँ
नोँनि खुगानिफ्राय खुदै ओँखारदोँमोन

नोँखौ दाक्टारनिसिम लाना थांदोँमोन
हामगोनबादि सान्नानै
नाथाय नोङो आनज्रायलाङो
लामा ससेयावनो हां हगारो

नोँ जोँखौ नागार लांबाय लोगो
मा जाहोनमोन नोँनि थैनाया?
जोँ दिनैबो मिथिया
नोङो लाइजाम गांसेबो लिराखै

नोँनि लोगो फरायसा फरायसुलिफोरा
नोँनि सारादुआव हाजासे गाबदोँमोन
नोँनि क्रुसखौ बेँखन्नानै मोदैजोँ

नोङो खारखोमा लांबाय लोगो
जोँनो जेबो गुमुर होलाङाखिसै
नोँनि बिस बथल बायनायाव
नोँनि लोगोफोराबो दंमोन
नाथाय नोङो थगायदोँ लोगो

आबादारिनि फिसा जानानै
आबादारिनो गोनां जानायबादि
नोङो बिफानि मुं मख'दोँमोन
नोँखौबो जोँ अराय फोथायोमोन

नोङो जोबोद मावथिमोन लोगो
नोङो मोजां गेलेगिरिमोनबो
नाथाय बहा थांखो नोङो लोगो?

नोँनि सारादुआव दोलोसे लोगोफोरा
गाबै गाबै खब'से ओँखाम जाब्ला
नोँ बहा थाना दंमोन लोगो
नोङो खुसि मोनदोँमोन दाबि!!

(रुंसारि जिबिका नार्जारि (1995-2011) लोगोखौ गोसो खांनानै)

* * * * * * *

मुश्री रन्जय ब्रह्म

फागुणखौ लानानै स्केट्स
-----------
बोथोरनि दुंहाव सान्दुंआव
खामानिखौ फोजोबना आं मेंग्लियो
अब्ला--
बारोन्दायाव आं उन्दुयो

सिरि मोनब्ला अखोरां नायहरो
दख्ला-दख्लि जोमैया
सोमखोर अख्रांखौ फांथेबायो
गोफाद सान रोदाया थुफ्लंङो

मानसि लांखार बिरदावो
जोमैखौ खेबख्लाब बायो
गावसिनि बासायाव लाबोयो

सिला बाजोआ गां फुवारो
आबै इंगिनिनि दाउसाखौ नायहरो
बिमाया दाउसाखौ बोजबो
बिसोर ज'ज' बिखायाव एब्रेयो।


* * * * * *