नुवाथारि
सोरां नों नुवाथारि
आंनि जिवनि आन्दोआव
अरायबो आंखौ नायहरग्रा?
नोंनो आंनि जिवनि लामा,
नोंखौ नागारना हाया मावनो जेबो
दं नों जेरावबो जेरैबो सुबुंनि लोगोआव।
मावगोमा नोंनि मिथिस' हाया रावबो
जायो आं नागिरना नोंखौनो हाखुर,
नाथाय मोना नुवा नोंखौ
खोनायोल' नोंनि गोदै मुंखौ
रोजाबो आं नोंनि मुंआव मिलौदो मेथाइ।
आनला आं सुबुं माहारि
नागिरो नोंखौनो खुरखाव खुरसि
मोनगोन सानना बहाबा।
फैदो नों आंनि सेराव
लांफैदो आंखौ नोंजों लोगोआव
थाहैगोन आं नोंनि देरायाव आलो-आलो
खालामहैगोन नोंजों गुलि गुलि,
निमाहा बियो नोंनि सेराव
मावनाय गोरोन्थिनि।
--------०-------
थि नोजोर
गैया आंहा मोनसे थि नोजोर,
बबेयाव जोबथा हैगोन मिथिया आं,
मिथिना मोनाखै आं गावनि थि थांखिखौ,
गैया दिनैबो थांना थाहैनायनि जायगा
बबेयाव सहैगोन आय' आंनि आगाना,
हायाखै आं दासिमबो रिंगाखौ सुनायनो
आंनि नोजोरा बबेयाव जोबथागोन
दिहुननो रोंआखै आं नोजोरनि जायगाखौ।
नाथाय बोथोरा हनै बिलिफां दुब्लियाव
गावनि सानलालिया सोनाब फैसालियाव,
खोमसिया साग्लोबनोसै हनै सिगां फारसे
नाथाय गैया आंहा दाबोनो थि नोजोर।
बिब्दिब्ला आं गोग्गो संसार दानायाव
सासे आन्दायारि नंआथ'????
--------०-------
खुद्रिनाय
अन्थाइनि गोसो उदखारिफोरनि
अस्थ्रजों गाद'बजानायाव
आं बोराबदों; खुद्रिदों
आरो गोब्राबै एमब्राबायदों
थेवब्लाबो आं
सिरियैनो थानांदों
सोदोब गैयि सानस्रिया
गोर्बोआव बिसोरनि फारसे
मुगैखांनाय गाब गाहोदों
आरो खोमसि खथानिफ्राय
सांग्रेमा लानानै नागिरो
गंसे गोदान मुलुग
मोनगोन जेराव
गावनि मोन्थाइ, थामोन्था
मुलुगनि दुब्लियाव जेरैबो सोरां
आरो.....
बरायो जेराव
बयबो गोजोन थासारि।
--------०-------
आंखाल
गंसे समायना ननि आंखाल जोंहा-
थागोन जेराव
आबै-आबौ
आइ-आफा
आदै-मादै
बिदा-फंबाय
बिब'-बिनानाव
आरो गोबां
बेनो जागोन जथाइ नखर।
गंसे गामिनि आंखाल जोंहा-
जागोन जेराव ग्रें ग्रें राज्यो
खैफोद-आफोद
निदान-आदानाव
नों फै
आइ फै
आफा फै
खर'नि जेंसिखौ बोखारफै....!
ज' ज' जालायगोन सावरि बादारि
मावलायगोन ज' ज' हाबा
गैया जेराव-
हिंसि-हिँसि
आरो
खोमसि फोथायथि।
गंसे सिबि सालिनि आंखाल जोँहा-
निमाहा बिगोन जेराव
मावफ्लांनाय गोरोनथिखौ निमाहा बिना।
गंसे राज्योनि आंखाल जोंहा-
गैया जेराव
नाख्रेबनाय - नासयनाय
थगायनाय - फोलानाय
आरो
एना - एनि
गावजोँ गाव
बोहैया थैनि बाना,
थागोन जेराव-
रंजा-बाजा,
समायना - रमायना जेरैबो
हाजो - हाला
स्राय स्राय दैमा- दैसा
बेनो जागोन राज्यो जोंनि
स'नानि बड'लेण्ड।
* * * * * *
बेनो जोँनि गामि
थाइजौ खान्थाल सारि सारि
गय फाथै बिफांनि बारि
बेनो जोँनि गामि।
न न माइ बाख्रि
लुन्दा लुन्दि माइहुं फुनजि
बेनो जोंनि गामि।
फुं मोना लावखारफोरनि
फालो फालो मोसौनि लारि
बयनिबो बाथौ गुदियाव आलारि बाथि
बेनो जोँनि गामि।
ज ज सावरि बादालि
सारि सारि नखरफोरनि लारि
बेनो जोंनि गामि।
* * * * * *
--------०------- |
