आर'नाइ

खौसेनि फिथाय़ (सल' बाथा) :-

लिरफिनगिरि:- मुश्री कल्याण स्बर्गीय़ारी।

     दाबसे हाग्राय़ाव मासे सेसा दंमोन। बिय़ो रंजानानै दैमा सेराव खारथिंनाय़ समावनो मासे खासेव लोगो मोनबाय़। खासेवखौ नुनानै बिनि लासै लासै थाबाय़नाय़खौ नुनानै बिखौ लाजि फोनांनो थाखाय़ मोनसे सोलो दिहुनबाय़।
     सेसा - थुदो थु जों खारनाय़ बादाय़लाय़नि।

     सेसानि सोलोखौ मिथिस्लाब हाय़ौ खासेवआ बुंबाय़ - थुदो बिदिब्ला।

     दसे उनाव मानैबो खारनो हमबाय़। सेसाय़ा जोबोत गोख्रै खारबाय़ नाथाय़ खासेवआ गोख्रै खारनो हाय़ा, थेवबो खारबाय़ थाबाय़। सेसाय़ा स’से खारनानै दंफां सिङाव द’से जिराय़नो सानबाय़। जिराय़नाय़ समावनो बिय़ो उन्दुलांबाय़। सिरि मोननानै जेब्ला खारफिनबाय़ अब्ला नुनो मोनबाय़दि खासेवआ सिगाङावनो थि जाय़गाखौ मोनहैनानै देरहाबाय़। सेसाय़ा गावनि गोरोन्थिनि थाखाय़ जोबोत लाजि मोननांगौ जाबाय़।

     सेसाय़ा सोलो बाहाय़नानै गाव देरहानो हानाय़ बाइदि हाजों खारनो बादाय़फिनबाय़। खासेवआ सिगां देरहादों नालाय़ दा खेबसेआवबो देरहागोन साननानै मदत होबाय़। खासेवआ बारा खारनो हाखाय़ा नाथाय़ गोख्रै खारनो हानाय़ सेसाय़ा बे खेबसेआव गोर्लैय़ैनो देरहाबाय़। जेननांगौ जानानै खासेवआ बे खेबसेआव लाजि मोननांगौ जाबाय़। लाजि मोननाय़ खासेवआ सेसाखौबो लाजि फोनांफिननो सोलो नागिरबाय़।

     खासेवआ सानसे सेसाखौ बुंबाय़ – सिगां खेबसेआव जों हाजों खारबाय़ नाथाय़ बे खेबसेआव जों दौमा बारनो बादाय़लाय़नि। खासेवनि बाथ्राखौ सेसाय़ा नागारनो हाय़ाखिसै। बे खेबसेआव खासेवआ गोर्लैय़ैनो दैमाखौ बारबाय़ नाथाय़ सेसाय़ा इसे नाजानाय़नि उनावनो बोरिसिम गिदिंना फैफिननांगौ जाबाय़। बि जाथाय़ाव सेसाय़ा जोबोत लाजि मोनफिननांगौ जाबाय़।

     सेसा आरो खासेव मानैबो लाजि मोनफिननांगौ जाबाय़ थानानै जोबोत दुखुबो मोनदों। उनाव बिबाइदि जाथाय़ जाफिननो हाय़ैबाइदि मोजां राहा नागिरनो मानैबो गोसो होबाय़। सेसाय़ानो साबसिन राहा मोनसे मोननानै खासेवखौ बुंबाय़ – जों सिगांनिबाइदि बादाय़लाइबाय़ थाब्ला सोरबा नङा सोरबा जेब्लाबो जेननांगौ जाय़ो, नाथाय़ बि खामानिखौ जों मानैबो ज’य़ै मावओब्ला जों जेब्लाबो देरहानो हागोन।

     सेसानि थांखिआव खासेवआ मदत होबाय़। सान्नाय़ बाइदिनो मावनो थाखाय़ मानैबो हाजों खारनो आरो दैमा बारनो नाजाबाय़। जय़ै हाजों खारनाय़ समाव सेसाय़ा खासेवखौ बाना लाबाय़ आरो जोबोत गोख्रै खारबाय़। बिबाइदिनो दैमा बारनाय़ समाव खासेवआबो सेसाखौ बाना लाबाय़ आरो जय़ैनो बारनो हाबाय़।

     सेसा आरो खासेव मानैबो हाय़ै खामानिखौ गोर्लैय़ैनो मावफुंनानै गोसो खुसि जाबाय़ आरो बादाय़नो गारनानै जेब्लाबो जय़ै खामानि मावनो थांखि लाबाय़।

*  *  *  *