आर'नाइ

 

-: खिथेर :-

       लिः- मुश्री दिदोम, थं-राङापारा कलेज

     
     मेट्रिक पाच जानानै आं गोजानाव थाङालासिनो जायगानि कलेजआवनो फरायबाय। गोदान साननाय हनाय, गोदान  मोनदांथि।
सल'मा  एबा सिनेमाफ्राव नुयो कलेज लाइफआवनो बांसिन मोजां मोनलायनायनि फाखनाव गोग्लैयो। गिबि गिबि थांजेननायावनो सिख्लाया सेंग्राजों, सेंग्राया सिख्लाजों सौग्रावलायनायनि खोनदो लाबोनानै सलमा एबा सिनेमाखौ बिदै गोनां खालामनानै फरायग्रा एबा नायग्राफोरनि गोसोखौ बोगथाबो। आंबो  सोरजोंबा सौग्रावबायगोनदां नंनानै सानफ्रोमबो कलेजआव थांदोंमोन।
नाथाय आंनि खाफालासो गाज्रिमोनना सौग्रावफ्लानोसो रोङाखैमोनथाय आं साननायबादि जेबो जायाखिसै।
      नाथाय मोनसे बाथ्रा साननैसो उनाव आं सासे सिख्लाखौ मेगन खेबदों। जोंनि क्लाचनिनो। मानसिया जोबोद समाइना। गुफुर गावदां, खावलाय फाउदुर, बेस्रां मेगन। माब्लाबा दखना माब्लाबा सुरिदार गाननानै फैयो कलेजआव। स्मार्ट। गोदानखाय  आं बिनि मुंखौ मोनथ'आखै। रावनिफ्रायबो सोंनानै लानायबो जायाखै।
      आं लाजिदोंबो फारसेथिं आं बिनि मुंखौनो मिथिया, जौगानाय ओनसोलाव थानानै देरनाय स्मार्ट सिख्ला, बेबायदि सिख्लाया माबायदि आंखौ जिउनि लोगो गनायनो! गामि गफानि आं एम्बुसो। नाथाय मा  खालामनो मोजांमोननाय गोरबो फिरायफिनजाया!!
थेउबो मिनिजानो गिनानै बे बाथ्राखौ आं लोगोफोरनोबो खिथायाखिसै। सिरियैल' मोजां मोनखुमा बोयो।
आं बिखौ सोमो नाङोमोन बर' बिजों फरायनायानो मासि इंलिच स्मार्ट बिलाय सानना। उनावसो मिथिबाय आं आमोखिया इंलिच मेडियाम फरायनायसो। बर' MIL लानायखाय आं बर' बिजों फरायनायसो सानदोंमोन।
      क्लाच लानाय समाव आरो माब्लाबा लामाफोराव लोगो मोनबा आं बिखौ नायगोमो फ्लाङोमोन। माब्लाबा मेगनजों मेगन सौग्राव लायोमोन। लाजिनानै बियो  नायगंफिनोमोन। मोजां मोनोमोनना गाज्रि मोनोमोनथाइ मिथिया। नाथाय आं माब्लाबा दाद्रि होजासिगोन साननानै नायगोमोनायखौ खम खालामनो नाजाबायमोन। थेउबो खि जाग्रा मोशौआ खि जाखायो होननायबादि आंनि बायगर मेगनआ बिखौ नायखुमायोमोन। बियो उनाव हमनो हाबायसोमोन नामा, जोंनि मेगननि सौग्राव लायनाया बारा जादोंमोन। लाजिनानै गावखौनो सानोमोन आं -थोत साला दैख'रनि एम्बु।
आगच्ट नि सानसेखालि  कलेजआव फ्रेचार्स जायो।
      हाबाफारि बायदियै जों गोदानै थांनाय फरायसाफोरा गावगावनि सिनायथि हैनांगौ। गोदान फरायसाफ्रा गावबागाव सिनायथि हैबाय। मोनसे समआव बै सिख्लायाबो गावनि सिनायथि हैदों। अब्लासो मिथिबाय आं बै सिख्लानि मुङा 'सोरजि'। बालिपारानि।
जोंनाबो लोगोफ्रा गावबागाव सिनायथि हैनायखाय आंबो हैनो गोसो जाबाय। नङाबा आं हैयासो सानदोंमोन। मानोना आंहा स्तेसआव गाखोबा हानथुगिला मावो। फारसेथिं सेनिअरफ्रा रेगिं खालामगासिनो।
गाखोहैबाय आं स्तेसाव। माइक्रफन खाथियाव बिसराम जानानै गसंहैबाय आं आरो बुंबाय -"आंनि मुङा श्री दिदोमसा बसुमतारी। आं थांनाय मेट्रिक आनजादखौ………"
      एसेयावनो सेनिअरफ्रा बुंहरबाय आंखौ- रथलाय, नोंना खुलुमबा आखाइया सिगाङाव थानांगौना उनाव थानांगौ?
"हा हा हा हा…… " बयबो मिनिजोबबाय आंखौ।
      खुनु रक़म हानथु गीला मावनायखौ हमथानानै बुंबाय आं-" स'…स'…सरी गोरोनथि जादों। सिगाङावसो थानांगौमोन। 
हाखु दाखु गावनि हुदा आरो जिउनि थांखिखौ खिथानानै ओंखारबोबाय आं। आंनि हालोदखौ नुनानै सेनिअरफ्रा आंखौ रेगिं खालामबावासै। करिदरसिम लाजिनानै आं मिसिबनानैसो ओंखारबोदोंन।
      फैनाय समआव आं सोरजि आरो बिनि लोगोफोरजों मोखांजों मोखां दामा मागा जालायदों। आं लाजिनानै बिसोरखौ गंस्रिनानै बारनो नाजाबा सोरजिया राव होदों - Excuse me!
आं सोरखौबासो राव होदों जानोहागौ नंना उनथिं नायबा रावबो गैया। बुंबाय आं-
-Yes
-दिदोमसामोन नामा नोंना मुङा?
-औ।
-खुलुमनो मोनफेराखैदां रावखौबो!!
      लोगोफोरा मिनिजोबबाय।
   आं लाजिनायखौ खुनुरकम लाखिनानै मिनिस्लुनानै बुंबाय- बावनायाबो।
-खुलुमथारैया बोसोरनैसो जाबायमोनदां ओंखायनो बावदों।
    लोगोफ्रा खुगा हमथा हमथा मिनिबाय। आं जेबो बुंनो रोङि जानानै सिरि थाबाय।
- Don't mind friend. जंखायदोंसो। Any way! See you again.
    बाथ्राखौ बुंनानै सोरजिया थांबाय। लोगोफ्राबो उन उन मिनिस्लु मिनिस्लु थांबाय।
आं गावखौनो जामबा बायदि मोनबाय। गोग्लैसोसिननाय मोनबाय गावखौनो।
    बे बाथ्राखौ आं नआव फैनानै गोसोखांहोलां लाजिनायखौ बांसिनहोलां मोनबाय। इसिबां गाज्रि लाजि फोनांनाय सि……!! गावखौनो गाव मा साननानै लादों बिलाय। गावखौनो खोब स्मार्ट मोनथारबाय नामा बियो। नायगोन आंबो नोंखौ।
नोंबायदि सिख्लाखौ लाजि फोनांफिननो हायाबा आंबो दिदोम नङा।
        सानै सानै आं उनाव मोनदांदोंदि जानांगौ बियो आंनि मोजांमोननायखौ हमनो हाखुमादों। ओंखायनो गोरलैयावनो बिजौ खेबस'नो आंखौ लाजि फोनांदों।
   गोसोजों गोसो सानदों आं -" नोंबायदि बाहादुरि सिख्लाखौ आंनोबो नाङा।"
जोबथारनायाव आं मोनसे थांखियाव फैनो साननायसै जे- आं बिखौ खिथेर होखारनानैसो गारगोन। लाजि फोनांफिनथारगोन आं बिखौ।
       अखानायै आं लाजिबांसिन कलेजआव थांदों। आं गेट बारलांब्ला सोरजिया लोगोफोरजों अडितरियामनि करिदुरआव दंमोन। आंखौ नुनानै राव हरदों बियो - Hi Didwm, good morning ! 
:Morning !- बुंफिनदों आं।
       आं बिखौ माबाफोर बुंफिनगोनदां सानदोंमोन। नाथाय बियो जेबो बुफिना लासिनो लोगोफोरजों रायलायनायाव मुखुब जाफिनबाय। आं मानोबा लाजिबाय। बयबो आंखौ नायहरनानै मिनिनायबायदि मोनबाय आं। नों आंखौ एसेबां जामबा बाहायबाय - गोसोजों सानबाय आं।
       बिनि बेबायदि आखुखौ आंनो आरोबाव खिथेर होखारनो थुलुंगा होनायबायदि मोनबाय आं।
     अखानायै बिखौ सुलु लानानै लाजि फोनांनायनि थांखि लाना थांबाय आं। नाथाय गिनायबो मोनदों आं आंबायदि जग्लबआखि बिखौ लाजिफोनांनो हाथारगोनना बे।           अब्लाबो थांबाय आं। केनतिन मोखाङाव दंमोन सोरजि गुरजिया।
:Hi, Phwrji- मिथिखा हसिखा फोरजि होनना बुहरदों आं।
   :Oh friend, Not Phwrji, Swrji. ok?
   :Oh, sorry. ओंखायनोथ' आं गोनोगोथो जाबाय थादोंमोन मा होननानै सोर फोरजि दोनखो बिनि मुंखौ होनना। "सोरजि" मोजां मुंदै। 
     :औ। आबै  गदाइआ दोननाय।
    :हाब नोंस्रा नोमबौआ हिनजाव सानैमोन?
     :औ। आबैमोना बिब' बिनानावनो बिहारिमोन। जा अनलायखायोमोन।
     :नोंहालाय बिब' गैया?
     :दं दंनायालाय। दंमालाय आं बिहा……… 
    दानो फोजोबजानाय नङा साननानै होनथेबाय आं- हे: हे: हे: आंथ' बिदि बुंनो……आतसा दोनदोदे बेफोरखौ।
       :जाहोनो हाग्रा बिगुमै मोनबा थांगोनबो आं। 
      :अह!  जाबायदे दोनफमथ' बेखौ।
   गावनि लाजिफोनांफिननायनि थांखिखौ एसेबो मावनो हानायबायदि मोनासै आं।
      जिखियानो जायामानो  बै सानखालिनो गावगावनि सिनायथिखौ जों मोजाङै लाज्लायो। सुथुरजों लोगो जाफ्लानो हानानै गावखौनो ऐसे मोजां मोननायसै आं। सानसेब्लाबो आं बिखौ लाजि फोनांनो हासिगोन बे लामाया गेउनानै थाबाय। 
     बेबायदि सानफोरा बारलांदों। आं बिखौ क्लाचफोरावबो लाजि फोनांनो नाजायो। गुबैयै जेब्ला जोंनि बर' MIL साबजेक्टनि क्लाच जायो। मानोना बियो इंलिच मिदियाम फरायनाय फरायसा। माबायदि बियो जोंजों फेर नांनो हायो गुबैयै आंजों। आं बिखौ जेब्लाबो खिथेरनि नोजोरजों नायो। नाथाय हायामोन।
      जोंनि गिबि बोसोरनि आनजादआ जोबनानै थाङो। रिजाल्टखौ बियो बर' MIL लाग्राफोरनि मादाव जों बयनिख्रुयबो साबसिन खालामो। नाथाय MIL आरो  Adv. BODO आव आंनि उनाव थायो। आं गावनि देरहानायखौ ऐसे थानायबायदि मोनो। नाथाय आंनि खिथेर होखारनायनि हाबिलाया बेयाव जोबनानै थाङा। खाबुखौसो नेगासिनो आं।
         जोंनि गेजेराव लोगो बायदियैनो सोमोनदोआ बारलाङो। सानफोरा बारलाङो। ओजोंजे आं बिखौ खिथेरनि नोजोरजों नायबोगासिनो बेखौ बियो मिथिया। बिखौ आं द्लाम सोलायनाय नुयो। आंजो लोगो गारसिनै जायो। मोनथारसिगोन नों र' सोरजि गुरजि सानो आं।
        ओजों जों सानैनि बांद्राय लोगो गारलायैखौ नुनानै लोगोफ्रा एदावनो खाबु लायो। नाथाय सोरजिया खेरखेरायैखाय आंबो जेबो साना।
           MIL Bodo  लाग्राफोरनि मादाव आं बयनिख्राय साबसिन रिजाल्ट खालामनो नाजाखुमाबाय थायो।
         सानसे जोंनि HS final आनजादआ जोबनानै थाङो।  बोसोरनैमानि आं बिखौ खिथेर होखारनो सानब्लाबो हामारासै। नाथाय आं रिजाल्ट नेयो।
        जों गावबागाव नआव फैयो। मानोना आं तावनआव रूम भारा लाना थायोमोन आरो सोरजिया हस्टेलआव थायोमोन। बियो गावनो  आंखौ  खौरां लाहरबाय थायो। मोनसिगोन नोङो। गोसोजों सानो आं। मानोना  रिजाल्टआ मोजां जायोब्ला आरो बेयावनो फरायफिननाय जायोब्ला फैगौ फ्रेचाचआवनो आं बिखौ लामा दिहुननानै लाजि फोनांथारगोन। अब्लासो बारगलांगोन नोंनि आंखौ लाजि फोनांनायनि खिथेरआ।
                रिजाल्ट होबाय। आं नाजानायबायदिनो जामारबाय। MIL Bodo लाग्राफोरनि मादाव जों सानैयानो बांसिन। थेवबो सोरजि गुरजिनि मार्कआ आंनि 2% कम जायो। बियो आंनो हामलायनाय बा वहरना मोनसे पार्ति दोननो खावलायहरो। 
         दासो सेमदों दुनाया? बुंहरनो सानदोंमोन आं। नाथाय बुङासै। फ्रेचाचआवसो मोनगोन नों।
           आं एडमिसनखौ बेवहायनो लाफिनबाय। सोरजियाबो बेवहायनो लाफिनबाय। बिमा-बिफाया गोजानाव दोनहरनो गोसोमोननो नाथाय गाव गोसो गैयैखाय थाङासै।
           सानसे फ्रेचाचनि सानआ सफैबाय। दिनैनि सानावनो आं खिथेरखौ लाथारगोन। बे आंनि समाय। बेनो जोबथा खाबुबो।
जों बे कलेजआव फरायखानाय फरायसा हिसाबै गोजाम फरासाफ्रा सिनायखायो। नाथाय गोदानै फैनाय फरासाफोरजों सिनायथि जानो जोंबो गावबागाव सिनायथिखौ हैनांगौ जायो।
      माखासे गोदान फरायसाफ्रा सिनायथि हैनायनि उनाव आंबो आंनि सिनायथिखौ हैनायसै। ओरैबायदि थियारि जाना थांखादों आंखौ रावबो रेगिं खालामनो खाबु मोनासै।
      आंनि उनावनो सोरजिया गावनि सिनायथि हैदों। 
     : खुलुमबाय, आंनि मुङा सोरजि बसुमतारी। आंनि जिउनि थांखिया जाबाय सासे फोरोंगिरि जानाय आरो हुदाया जाबाय मोसानाय।
      "रथ" सेनिअरफ्रा बुंहरबाय  "अब्लाबा ऐसे मोसानानै दिनथिदो"।
          : जागोन।
सोरजिया गावनि मबाइलनिफ्राय मेथाइ चेलेक्ट खालामखाना हरनानै मोसाबाय।

" नों सैयाब्ला नों नायफिनाब्ला
आंहा मा जागोन सिरि सिरि
नोंनिख्राय देरसिन आरोमा दंबावो
हमनो हादोंना हायाखै फारि फारि…"
       आद्रा मोसाहोनानै थिनहरबाय सोरजिखौ। मोसानो गोरोंखा आमोखिया।  ओंखारबो नों गुरजि सानबाय आं। 
        नाथाय आंनि सेराव जिरायफैयैखाय जेबो बुनो खाबु मोनासै आं। थांनोसै समआव बिदाय लाना बुंबाय आं सोरजि गुरजिखौ - आबै सोरजि सोर जोहोलाव बे नोंखौ बिदि आलाय सिलाय खालामनाया?
       :मायासै?
       :नों दहाय मोसानायानोदा?
      : ए । दं आरो ।- मिनिस्लुयै बुंबाय बियो।
      मानजा खालामनो हायैबायदि मोननानै बुंबाय आं- बेखौनो नोंहा प्रीनचिपाल, प्रफेसारफोरनि सिगाङाव खिथानांगौ जाबाय?
       :बेमारा जाबाय जेब्ला लाजिनांगौ माँ दंबावो!
     हाब! मानजाखौनो खालामनो हामाराथ' बिखौ।
     :अह गड! इसिबां गोबाव आंनो मानो खिथायै नों?
     : नों सोंफेरदों?
     :हमना ला आं दा सोंबाय।
     : माब्लाबा खिथागोन।
   "माब्लाबा खिथागोन…" होनना बुंफानानै जंखायनो सानदोंमोन आं। माब्लाबानो थांबाय बियो। 
     :माब्लाबा नङा गाबोन। - बुंहरबाय आं।  आंखौ नायहरफिननानै जेबो बुङालासिनो थांबाय सोरजिया। आंबो फैबाय।
      नआव फैनानै सानदों आं गाबोनथ' बियो  आंनो खिथासिगोन। बिनि Boy Friend खो लानानै  insult खालामगोन आं।
      थेवबो आं मानोबा दुखु मोनबाय। मानोना आं बिखौ नै बोसोर सिगां मोजां मोनदोंमोन। खिथेरनि अरआव बार सुनानै बे  बाथ्राखौ मालाबानो बावलांबायमोन।  दिनैसो गोसोआव फैदों।
अखानायै आं सोरजिखौ Girl common room नि करिदुरआव लोगो मोनदों।   
     :Hi Swrji, Good morning. - राव हरदों आं।
     :Morning!
      सिगां आंखौ नायख्लेनानै थानायबायदि आंबो नायख्लेंनानै थांनो सानदोंमोन। नाथाय बियो आंनि उन उन फैफाबाय।
केनटिन मोखाङाव गसंफैबाय जों। क्लाच गैथ'आ।
       :मैया खिथानो होननाया खिथादो। - बुंबाय आं।
        :बावथारा जाहैबाय?
        : बावो सोरबा रमान्सनि बाथ्राखौखि।
       : फै बिदिबा बै दंफां सिङाव।
       केनतिन सेराव खानथाल बिफां दं बे सिङाव जिरायबाय जों।
      : नों बिखौ मिथिनायनि उनाव आंजों लोगो गारनाय नङाथ'?
      : आंहाथ' बिदि सुथुर गैया।
      : नों समाइ ला।
      : दे समाइ लाबाय आं।
     दसे सिरि थाबाय सोरजिया।
    :बुंदो। - बुंदों आं।
    : आं……आं लाजियोबो। नाथाय आं लाजिनानै मुलाम्फा गैला।
    :Right. बुंदो।
    : बियो रावबो नङा दिदोम। नों, नोंनो। मिथिगौ नों आं नोंखौ मोजां मोननाया बेसे बोसोर बारलांखो?………
       : मा………? - आं गोमोबाय।
    : नों मा बुङो हो?? नों गनायाब्ला ……
     : नों दिनैसो बुंनो मोनबाय बे बाथ्राखो?
     : औ। नोंनो खाबु होआखैमोन। मैयासो नों खाबु होबाय आंनो।
      आं रंजानायनि उसिफावनाय गोसोजों बिनि आखाइयाव हमनानै बुंबाय-  आंबोथ' नोंखौ नै बोसोर सिगां मोजां मोनदोंमोन। मैया आं नोंखौ खिथेर होखारनो बेबादि सोङाब्लाथ' नों माब्लाबाबो बुंनाय नङामोन?
     : खिथेर?
     : औ खिथेर।
     सोरजिया दसे मिनिस्लु सिरि थाहाबना बुंबाय - आंबोदि नोंखौ खिथेर लानोसो बिदि बुंदों।
    : हा, मानि?
    : नों आंखौ बिदि सोंनायनि?
    : मा………………??
    आं दुफुं सिखारनानै फैबाय। लं लंनो। सोरजि आ आंनि उन उन फैफानानै बुंहरदोंमोन - रथ'लाय दिदोम, र' Please. 
    नाथाय आं नायहरासै। थाथ'आसैबो। 
    नआव फैनानै सानफैदों आं -आं माब्लाबाबो बिनि सेराव देरहामारासै। बिखौ खिथेर लानाय थांखिया माब्लाबाबो जाफुङासै। मा मोखांजों आं कलेजआव थांबावनो।
        सोरजिखौ लोगोमोननाय, कलेज फरायनाय, बिनि खिथेर होखारनो नाजानाय आंनि थांखि  बेफोर गासिखौबो एसेआवनो थुंगिनायबायदि मोनबायमोन आं।
………
     नाथाय थुंगेयाखै। जानागौ गोदानैसो जिउ मोनदों।  मानोना मोनाबिलियाव आंनाव मोनसे SMS फैदों। बेयाव लिरनाय दं - "नोंनि खिथेर सोदोबखौ खोनानानै आं जंखायदोंसोमोन दिदोम। Sorry ! I really Love you. 
      SMS खौ फरायखांनानैसो आंनि खिथेरखौ आबुं जानाय मोननायसै आं ।।
 

••••••••••