निन गैयै बिसमबि सानस्रि
मुश्री भूपेन्द्र नारायण बसुमतारी
बिसनायाव उन्दुदोंब्लाबो उन्दुलांनो हायाखै
बाइदिसिना सानथायफोरा थुबुर थुबुर एदावफैदों,
गुदि फरायसालियाव फरायदोंमोन -
"गोगो थराइना बिथराइ जों
थराइ बिजाब फरायगोन जों"
अब्लाबो खम बायगर नङामोन आं
बिफां गाखोनायाव माब्लाबाबो जेनफेरामोन
जामबुरा जोखावनायावबो सिगांखामोन
सानखान्थियाव हले गादाथारमोन
सान्नाय फारियावबो खोमा खेबजाबाय थायोमोन ।
सानसेनि खोथाखौ हले आं दाबो बावनो हायाखै -
हांमालिखौ साइकेलनिफ्राइ खोख्लैनायखौ
मोखाङानो नाइजाथारि जालिलि जालायथारदोंमोन
बिसो आंनो लजेन्स-हुरुम होफैबाय थायोमोन,
दाबा माबोरै दं, लोगो मोनैया गोबाव जाथारबाय.... !
रामोनदानि खोथायाथ' जुदाखा
ना बोननायाव मागुर ना आं मोननायखौ गावनो हरैनि
बोरसिजोंनो आंखौ खोमायाव हाइदोंमोन
अब्लाबो बियो दिनैसिमबो आंखौ लोगो गारा
बुंबावदोंसो - "होद, जोंहा सानैजों बियाइ लिंलाइनो नांगौलै ।"
बै लद्रायाबा मा मावनानै दं
खम दुथां नङामोन बियो
बाथा गेलेनायाव गाव जेनब्लाबो माब्लाबाबो जेननाय लायामोन
ओंखाम-ओंख्रै गेलेनायावबो गाव हौवा गोदान जानो मोनाब्ला ब्लद नआव खारलांग्रामोन ।
गयस्रि, सोमस्रि, रनिलामोनहा जुलि जाजोबबाय
बिमाबो जाबाय जानांगौ ...
लोगोखौनो मोनथारलिया
जिउ खांनायनि लामायाबो जुदा जुदा जाबाय
अब्लाबो जोंनि दिननि अनलायनायफोरा आमथा आमथामोन
दानि मुगानि अनलायनायफोरा माथो खाथो खाथोसो....!
सोरांब्लानो दुम-दाखाल, दावराव-दावसि
गावजों गाव एना-एनि
खालि नों हायोना आं हायो फेर फाथिलायनाय
जेथिंबो जेरैबो दुं-दुं हाव-हाव अर खालि अर
बिबदियाव जोंबादि सासालगा माबोरै थावरिनो हानो ..
जोंहाथ' पलिटिकेल लिडार बेक ग्राउन्डआव गैया
सोरखारि साख्रिनि थाखाय घुस होनो हाजासेबो बेंक बेलेन्स गैया
अब्ला बोलिनि बोरमा फानथा जाया मा जानो जोंलाय ...!
अन्थाय देख्रुब देख्रुब जागोन जों
अन्थाय देख्रुब देख्रुब जागोन जों ....
टक टक टक
"आदा, सिखारद', सोरांबाय।" बिनानावनि राव।
हो, बागदावखांदों आं
नंमारगौ सोरांमारबाय
खिरखिनि गब्लंजों माब्लाबानो साननि सोराङा आंनि रुमाव हाबफैनानै दं।
--------०------- |
