लिः- मुश्री कल्याण स्बर्गीय़ारी
मागो दमांसिनि सिगां हराव बाथिसे मोजांओइ थुब्रि जानाय़ा बर’ हारिनि एबा असमनि हारिमुनि गारनो हाय़ौ आय़दा। आं उन्दै समाव गामिनि लोगोफोरजों नारा हानानै भेलागुर लुदोंमोन। थुब्रि खाना जानानै हराव उन्दुनो हानाइ बाइदि न’सा लुदोंमोन। अ’खानाय़ओइ भेलागुर सावखांनानै न’साखौबो सावनाइ जाय़ोमोन। बिफोरखौ मावनाइनि गेजेरजों आं जोबोत रंजानाइ मोनोमोन। हरनि थुब्रि खानाखौ जानो थाखाइ नांगौ मानि गासैखौबो जों बुथुमनो नाजाय़ोमोन। जों गावनो संनो रोङा नालाइ सोरखौबा संनो लिंनांगौ जाय़ोमोन। खानानि थाखाइ गासै खामानिखौ जों गोसो गुदुङै मावओमोनब्लाबो गालाइ गुजाइआ जोबनो गैय़ामोन। जानाय़ आय़दाफोरा गोथाव बुंजाथाव जाय़ामोन नाथाइ बइबो लोगोसे रंजानानै जानाय़ासो गुबै बाथ्रा। अ’मा एबा दाव बेदरा गुबै आय़दा महरै थानानै खानाखौ जाथाव जाहोय़ोमोन। फिथा जानानै उदैय़ा खनासे बुंखानानै थाय़ोखाइनो बारा जानोबो हाय़ामोन। बिबाइदिनो आंनि उन्दै समनि मागो दमांसिफोरा बारलांदोंमोन।
दिनै आं साख्रि मावनो थाखाइनो डिफु, गुवाहाटी, कक्राझार, नगाँव बाइदि जाय़गाय़ाव थाबथिंदों। बिफोर जाय़गाय़ावबो खाना जानांगौ जादों। नगाँवनि दाबसेआव खेबसे गोदानै भारा न’ लानांगौ थाहैदोंमोन। बि जाय़गाय़ाव जानाइ थुब्रि खानाखौ नाथाइ आं जेब्लाबो बावनो हाय़ा। बि खानानि गेजेरजों नगाँव थाउनाव जों खाथि खाला थानाइ गोरों गोरा मानसिजों मिथिलाइनाइनि लोगोसे ओंखाम बाथिसे जालाइदोंमोन। जोंनि जाय़गाय़ा नगाँव थाउनब्लाबो इसे जानगारमोन। नगाँवनि मानसिय़ा बाइदि जानाय़ लोंनाय़ाव इसे गोसो होग्रा होननानै आं बुंनो हागो। खाना जागोन जेला गोथावय़ै बाथिसे मोनजागोन होनना आं सानखाबाइ थादोंमोन।
खानानि गुबै आय़दाय़ा जाबाइ दाव बेदर। दाव माब्रै। खानाय़ा मोजां जानांगोन जेला साफ्रोमबो फारा फारि साबसिनै मावनो नाजादोंमोन। दाव बेदरखौ साबसिन जाथाव जाहोनो थाखाइ सासेय़ा प्रेसार कुकाराव रुहैदोंमोन। फानथाव बिलाथि, गाजर, सामब्राम गोजा, मुला आरो फाल्लौखौ मिक्साराव होनानै बाथोन बानाइदोंमोन। दालिखौ प्रेसार कुकाराव मोजाङै रुना लाग्रोदोंमोन नाथाय़ मानसिय़ा इसे बुर्जा जागोनखाइनो दैखौ बारा होनांगौ जादोंमोन। बेसनजों एवनाइ फान्थावआ फ्रोम जाखाङो नाथाइ बेसनखौ बाइनो बावगारबोदों बिनिखाइनो थावजोंनो एवदोंमोन। न’खरैनो थुब्रि जानाइ खाना नालाइ हिनजावफोरानो संनाय़ाव आवगाइदोंमोन। सासे हिनजावआ गावनि न’निफ्राइ लाबोनाइ औआ मेवाइनि आसारा खानाखौ साबसिननिख्रुइ हामसिन जाहोगोन होनना साननाइ जादोंमोन। माइरं गोदाननि जुथि लानो थाखाइनो ओंखामखौ माइरं गोदाननि संदोंमोन।
खानाखौ जोंल’ जाय़ाखै, न’ न’ आरो थुब्रिय़ै सेंग्राफोराबो जादोंमोन। थाउनाव लांदां जाय़गा मोननो गैय़ा, जेराव दङ बिबो जाबोर बारि। जोंनि इसे गोजानावनो सेंग्राफोराबो खाना जादोंमोन नाथाय़ बिसोर मोजां जाय़गा मोनाखैमोन, बिनिखाइनो सेंग्राफोरा रागा जोंखोमाना दंमोन।
जों थानाइ न’आनो ब्लां ब्लां गिदितखाइ खानाखौ जोंनि न’आवनो जादोंमोन। मोनसे समाव बैबो गाहाइआवनो ज’नानै थुब्रि खाना जानो लाबाइ। सिगाङाव ओंखाम रानजेननाय़ावनो मिथिनो मोनबाइदि ओंखामा जोबोत मोजाङै मोनदों आरो अरनानै जानो नाङै बाइदि दैजों आवलि लांदों। खानाखौ जानो लानानै साननांगौ जादोंमोन, मानोना आंनि जीउआव बिबाइदि खाना जाफेरना मोनाखै। दाव बेदरनि अनला ओंख्रै सोरबा जाफेरदों जानो हागौ नाथाइ आं बिदिनखालिसो जाजेनदों। दाव बेदरखौ कुकाराव मोजाङै फोमोनब्लासो बिय़ो जाफुङो। गुबुन मोनसेआ जाबाइ लाव लाव बाथोन, बिखौ मिक्सारजोंसो बानाइनो हागौ। दैस्रां दालिआ बि मोनथामखौबो साबसिन महर होदोंमोन। औआ मेवाइनि आसारा गासै आय़दाखौनो साबसिननिख्रुइबो हामसिन जाहोदोंमोन। लाइजु लाइआव जानो समाव जानाय़ आय़दाफोरखौ मोनसे मोनसे जाबाइ थानांगौ जाय़ाखैमोन, ज’य़ैनो जानो हादोंमोन। अरनानै जानो नाङै गासैबो आय़दाय़ानो लाव लावखाइनो साफ्रोमबो जानानै खुसि जादोंमोन।
बिबाइदि थुब्रि खानाखौ जाबाइ थानाइ समावनो हरखाबै उखुमनि थिंआव माखासे सार अन्थाइ गोलैदोंमोन। बोथोरा जोबोत मोजां लोगोसे अखाफोर दानसोरां, थेवबो सार अन्थाइ। साफ्रोमबो सानदोंमोन बिय़ो मा जानो हागौ थेवबो रावबो जानाइखौ गाराखै। आयदाफोराबो गासैबो लाव लावखाइनो मननाइआवबो इसेबो गोब्राब जाय़ाखैमोन। जाखाङागौमानि सार अन्थाइआबो गोलोइबाइ थादोंमोन। साफ्रोमबो जाखांनानै जेब्ला अन्थाइ गोलैनाइनि जाहोनखौ नागिरबाइ अब्ला सानैसो सेंग्राखौ खारलांनाइ नुनो मोनबाइ। रावनिबो खानाय़ा बिबाइदि दाजाथों नाथाइ आंनि जीउआव बिय़ो बावनो हाय़ै खाना जानानै थाबाय़।
