आर'नाइ

मुश्री कनकलाल स्बर्गीयारी आरो देंखो

बर' मेथायनि लामा दिन्थिनाय गिबि खनगिरि होनोब्ला बिथां मुश्री कनकलाल स्बर्गीयारीनि मुंखौ लानांगौ जायो। 01-10-1952 खालाराव आगोलनि कामरूप जिल्ला आरो दानि बरपेटा जिल्लानि, सरूपेटानि खाथिआव थानाय गेरुवापारा गामिआव बिथांनि जोनोम जायो। बिफानि मुङा (रुंसारी) सनाराम स्बर्गीयारी गामब्रा।

बिथांनि बाइदिब्ला- बै निजोम गामिया देंखोजों गोदैमोन। गोथां फोथारजिंनिफ्राय रिंखांफैयोमोन रोमै चिफुंनि देंखोआ। मोनाबिलिआव बेण्ड पार्टि दामग्राफोराबो तालिम होयोमोन। हाबाफोराव बिखौ दामनाय जायोमोन। बिचोरनि दामनाइनि देंखोजों रंजानानै जों मोछाग्लांदोंमोन। बिबाइदिनो गोसोनि बबेबा खनायाव देंखोआ जायगा लादोंमोन।

बि समाव मोनाय़ाव फराइनाय़ फराइशाली दंमोन। बिय़ाव जों खेराचिननि बाथि फोजोंनानै एबा एण्डि बेगरखौ ऊवानि गनचाय़ाव लारिय़ै चुनानै फोजोंनानै फरायदोंमोन।

सानफ्रामबो स्कुलाव आरज मेथाय खननायखौ आं दैदेनोमोन। सरस्बती फुजायाव ज' जाना जों मेथाय खनदोंमोन। बिबाइदिनो मेथायखौ मोजां मोननाया आंनि बांलांदोंमोन।

हाइ स्कुलाव फोरोंगिरिफोरनिफ्राय आं अननाय मोनामोन, मानोना आं फराइनायाव गोसो होआमोन। फरायनो बानानै मैछोनि बिखुङाव गाखोनानै गाबख्रावनानै मेथाय खननोचो मोजां मोनोमोन।

डाइन थाखो मोननाय समाव गोदान गाहाय फोरोंगिरि मुश्री अचुतानन्द दत्त फैदोंमोन। बिथाङा साचे थुनलाइआरी, सुबुं फोचाबगिरि आरो देंखो मोजां मोनग्रामोन। जाइखि जाया फान्सन जाबोला जेब्लाबो हा़न्जा मेथाय खननायनि लाहार फाहार खालामदोंमोन। बिफोराव आं जायगा मोनामोन। खिरखिजोंसो नाइहरोमोन।

मोनसे समाव मेट्रिकनि बिदाय होनायाव आं मेथाय खननो मोनदोंमोन। लोगो दिबाकर पाटगिरिया तबला दामनाइजों खनगिरि बिथां जयन्त हाजरिकानि मेथाय "लुइत काबेरी सिन्धु गंगा" मेथायखौ खनदोंमोन आरो गाहाय फोरोंगिरिनि बाख्ननाइनाय आरो थुलुंगा मोनदोंमोन।

मेथायाव आं बांचिन गोसो होनो हमदोंमोन। दोंचे दोंनै मेथाय लिरनोबो लादोंमोन। मल्त्री महेन्द्रमोहन चौधुरी आरो फकरउद्दिन आलि आहमेद फैनाय मिटिंआव आखौ बेखेवनाय मेथाय खनहोदोंमोन आरो बियो आंखौ बांचिन थुलुंगा होदोंमोन।

गाहाय फोरोंगिरिया बिथां रेडिअ' खनगिरि जगेच भरालीजों चिनायथि होदोंमोन आरो सरगम आरो मेथायनि गियान होनो खिन्थादोंमोन।

मेट्रिक आनजात होखांनानो आं गुवाहाटीचिम फैदोंमोन। बि समाव उजान बाजाराव लक्ष्नौनि भातखाण्डेनि चिङाव मिउजिक कलेज दङमोन। खननाय फोरोंगिरिया प्रिनचिपाल गावनो बिथां सुन्दर बरदलै सात्रीय़ा मोचानायबो फोरोङोमोन। आंबो नाम लिरनानै खननायाव बिशारदचिम चोलोंदोंमोन।

आं कमार्च कलेजाव फरायदोंमोन। बियावनो माखाचे देंखोआरी लोगो मोनदोंमोन येरै गोपाल बड़ो(मेण्डोलिन दामग्रा), भुपेन उजीर, बिपुल बरुवा बाइदि। कलेजनि साबचिन खनगिरि जानो हानानै जोबोत मोजां मोनदोंमोन।

Inter College Competition, Guwahati University आव सनानि मेडेल मोननानै खननायाव बांचिन थुलुंगा मोनबावदोंमोन।

आं लोगो मोनदोंमोन बिथां प्रफेचार तफतजुल आलिखौ, सुजुगिरि आरो देंखोगिरि, कमार्च कलेज, बिथाङा जोंखौ असमीया फोरोंदोंमोन। बिथांनिफ्राय़ गोबां देंखोनि गियान मोनदोंमोन बिखौ आं दिनैचिम बावनो हायाखै।

गोबां देंखोगिरिफोरजों लोगो लानानै जों रेडिअनि Youth program खालामदोंमोन। बिफोरनि गेजेराव बिपुल बरुवा, अपुर्ब्ब बेजबरुवा, हेमेन दास आरो माखाचे गोदान देंखोआरी। बि समाव रेडिअ'नि देंखो दिहुनगिरि जितेन दास, मुकुल बरुवा, हेमेन हाजरीका बाइदि गिदित देंखो सुजुग्राफोरजों चिनायलायदोंमोन आरो बिथांमोना लामा दिन्थिदोंमोन।

आं बिरेण फुकन, हिरेन शर्मा, आरो देबेन शर्मानिफ्राय भजन सोलोंदोंमोन। क्लासिकेल रागनि सायाव गजल, ठुमरि, दादरा, ताराणा बाइदिफोरखौ आं बिरेण फुकननिफ्राय गोबांङैनो दिन्थिनाय मोनदोंमोन। बिथाङा खेयाल खननायाव लक्ष्णौनि सोनानि मेडाल मोननाय।

श्री राजेन हाजोआरी मुंनि साचे तबला बिशारदजों आं चुनचालि बागाननि मोनचे फिचा देरायाव ज'वै थायोमोन। हाग्रा गेजेरनि मोनचेल' न' जानायखाइनो सानावबो बियाव रावबो थाङामोन आरो हरनि खोमचिआव लामाखौबो नुवा जायोमोन।

आं जोबोत गोबाववै बर' मेथाय खननो लादोंमोन। खनजेननाइनिफ्रायनो आं असमीया मेथाय खननाइनि गेजेरजों सोलोंबोदोंमोन। बर' मेथाय खननो थाखाय बि समाव जेबो खान्थि मिथियामोन। रेडिअ'जों फोश्रावनाय मेथायफोरा गाचैबो खुगा मेथायमोन, गोदान मेथाय बि समाव फोश्रावनाय जायामोन।

जिखि जाया खुगा मेथायनि सायावनो देंखो बानायनानै रेडिअ'आव अडिसन होदोंमोन आरो जायगा मोनदोंमोन। जानो हागौ 1976 नि जुन एबा जुलाइ दानाव आंनि बर' गोदान मेथायनि चेथि रेकर्डिं जादोंमोन। गोपाल बड़ो आरो आं कलेजाव फराइनाय समाव बर' गोदान मेथाय दिहुननो थाखाय नाजाबाय थादोंमोन। रांनि थाखायनो दिहुननो हायाखैमोन। गोबां साननांगौ जादोंमोन राहा नागिरनानै। बि समावनो गुवाहाटीनि मुश्री अतुल बड़ो MA बिथांखौ लोगो मोनदोंमोन। आंनि लोगो बिथाङा इसे रां होनानै राहा होदोंमोन। बिबाइदिनो जोंनि EP Disc "Nara Raco" companyनि नाजानायाव दिहुननाय जादोंमोन। गुवाहाटीनि "ज्योति छित्रबन"खौ साननैनि थाखाय लानानै रेकर्डिं खालामदोंमोन। दामनायाव- सिफुङाव बिथां प्रभात शर्मा(रेडिअ' आर्टिष्ट), की बोर्ड-रमेन चौधुरी, तबला-अभिनन्दन बणिक्य, तुमबा-अकण मजुमदार, गीतार-हायदर आली, मेण्डोलिन-गोपाल बड़ो। मेथाय सुजुगिरि, देंखोगिरि आरो दिहुनगिरि आं गावनो।

मेथाया दोंब्रैमोन-

1. बेचर बारिआव सोर सिखोला।

2. बोरसि दैमा बारनायनि।

3. चमायना चमायना। लोगो खनगिरि-मुश्रीमा खन्थायमनि पाटगिरि।

4. उनावचो जों दाबो।

जानांगौ बिनो जोबथा बर' मेथाय़नि EP Disc । बिनि उनाव फैबाय केछेटनि युग।

1984 माइथायाव मोहन मिउजिकनि नाजानायाव "Bodo Songs" मुङै मोन डाइन बर' मेथायजों केचेट दिहुननाय जादोंमोन। बि केचेटा गोबां गोसारनाइनि उनाव आरोबाव मोननै केचेट मोहन मिउजिकनि नाजानायाव "हांमा" आरो "संसार" दिहुनबावनाय जादोंमोन। बिनि उनाव Companyआ "थराइना बैछागो" आरो "गोलौ गोफौ" मुंनि मोननै केछेट दिहुनबावदोंमोन।

आंनि सुजुनाय आरो देंखोजों "फामि" केछेटखौ दिहुनदोंमोन। दामनाय आरो सुजुगिरि मुश्री जितुल सोनोवाल, खनगिरि मुश्री अरुण नार्जारी आरो मुश्रीमा सुलेखा बसुमटारी। बिथांमोन गासैबो रेडिअ' आर्टिष्ट। केछेटखौ दिहुनदोंमोन मिवथिजानाय "Music Makers"आ।

थि माइथायखौ आं बुंनो हानाय नङा नाथाय जि समाव गुवाहाटीनि दूरदर्शन Centerनि थाथाया पानबाजाराव जाजेनदोंमोन। बिनि जाजेननाय प्रग्रामाव आंबो जायगा मोनदोंमोन। मुश्री लक्षण बड़' मुंनि सासे TV नि मावथिया आंनो रेकर्डिंनि खालार होनानै थांदोंमोन। बिनो आंनि सेथि TV प्रग्राममोन। गोदान माइथायनि प्रग्रामनि थाखाय बोसोरथामाव खेबथाम राणी छाह बागान आरो सोनापुराव खेबनै छुटिं लादोंमोन। बिफोरखौ दूरदर्शना फोश्रावदोंमोन।

1985- आंहा गोसो दंमोन फिल्मनि हादोदाव खामानि मावनो नाथाय समा आंखौ हेफाजाब होआखैमोन। यि समाव आं असम सचिबालय अफिचाव छाख्रि मावदोंमोन बि समावनो आं डकुमेन्तारि मोनसे दिहुननो आखायाव लादोंमोन। बेसेबांबा ओंथि फोरमायनायनि उनाव "बड़' गामि" (Bodo village daily life नि सायाव) Cultural Departmentनि ग'नायथि लानानै 30 मिनितनि Documentary बानायनानै 1997 माइथायाव छरकारनो ग'थायना होदोंमोन। बिखौ डकुमेन्तारि फिल्म फेचतिभेलाव दिन्थिनाय जादोंमोन। बि फिल्मआव दोंब्रै मेथाय दंमोन। बिखौ खनदोंमोन मुश्री कालि राम रामचियारी, मुश्रीमा महिनि रामचियारी, मुश्रीमा चञ्जु बसुमतारी, मुश्री कनकलाल स्बर्गीयारी आरो माखासेआ। गुबै भावथिनायाव दङमोन मुश्री गजेन बड़ो, रुंचारी यगेन्द्र खेरकटारी, मुश्री नारायण रामचियारी बाइदि। गाचैखौबो बुंजोबनो हायाखै बिनि थाखाय दुखुथिया। 16mm जानायखाइनो TVआ दिन्थिनो हायाखै। दिन्थिनाय बिबाना चरकारनि आखायाव दङ।

1998 माइथायनिफ्राय 17 बोछोर सम आं मेथायनि मुलुगनिफ्राय गोजानाव दङमोन। न'खरनि फावचायना थालांनाय खामानिफोरखौ जाफुं होनो थाखाय इसे सम लादोंमोन। दा 59 बोछोर बैछोआव जिखौ मावनो हागौ बर' राइजोनि हारिमुनि थाखाय मावनो नाजागोन।

बिबाइदि थाद'नाइनि गेजेरावनो रेडिअ' आरो टिभिनि मानसिया आंनि हारिमुवारी खौरां लानो थाखाय धिरेणपारा, रघुनाथ पठ, गुवाहाटी-25 नि न'आव नागिरफैदोंमोन। रेडिअ' आरो टिभिनि मानसिय़ा बिबाइदि मान होनायखौ आं जेब्लाबो बावनो हाया। बि न'आव आं साथाम फिसाजों गोरलैयै जीउ खुंनानै दङ।

आं मेथायनि देंखो होनानै मोजां मोनोमोन। आं रेडिअ'आव खननाय गाचै मेथायखौनो गावनो देंखो होदोंमोन। मेथायनि बाथ्राया जिखियानो जायाथों देंखो होनानै आं जीउ मोनदोंमोन। गावनो सुजुनाय मेथायाव गोर्बोनि सान्नाय थायोखायनो सुजुनाय लोगोचे देंखोआबो जालाङो। गावनि गोर्बोनि सानश्रीजों सुजुब्लाचो मेथाय जायो।

आं गावनि मेथायनि अनगायैबो गोबां रेडिअ' खनगिरिनि मेथायनि देंखो होदों। बिफोरनि सुजुगिरिआ रेडिअनि गणायजानाय। दासिमबो सोरबा फैयोब्ला देंखो होदों।

असमीया रावआव "अमीया" मुंनि मोनचे केचेट मुश्री फुलेश्बर बड़ोआ दिहुनदोंमोन। जोबोत नाजानानै बिथाङा बिखौ दिहुनदोंमोन। बि केचेटाव आंनिबो दोंनै मेथाय लानाय जादों। बिथां फुलेश्बर बड़ोआ आंनि बर' मेथाय खननायावबो हेफाजाब होदोंमोन। देंखोखौ बिथाङा मान होय़ो।

बेसेबांबा मेथाय थालांबावबाय खननो। गावनो लिरनाय बर' आरो असमीया मेथायफोरखौ साफायनो थाखायबो सम मोनाखिसै।

S.N. Productionआ "सप'नरे रं" मुंनि मोनसे CD दिहुननो नाजादों। बियाव आंनि सुजुनाय आरो देंखो होनाय मोन डो मेथाय थागोन। दामनायनि बिबान लादों मुश्री प्रसन्न दासआ। बर' सुबुंखौ खावलाइयो, निमाहा बियो मानोना जों खनगिरिया जायखिजाया रावआव मेथाय खननाइनि धोरोम लाखिनांगौ जायो। बिनि उनाव S.N. Productionआ आंनिनो मोनड' बर' मेथायनि गुबुन मोनचे एलबाम CD दिहुननो थांखि लाबावदों।

आंनि इसेल' खाबुआरी जीउखौ थिछननो गोबां थाबावबाय। गोरोन्थिखौ फोसाबना लानो थाखाय आरज थाबाय।

थि-मिथिसार:-

आंनि बि गोबाव समनि देंखोनि नांथाबनायाव फोरोंगिरिफोर, खोनाग्राफोर आरो सोलोंग्राफोरनि अननाइयावनो देंखोखौ फोथांना लाखिदों। आंगि गोर्बोआवबो हारिनि थर दङ। हारिनि थरजों हारिनि थर गोनां मेथायबो खनदों। गोदान हाबा फारिबो लादोंमोन नाथाय दुखुनि बाथ्रादि आंनि देंखोनि जीउआव आंनि हारिनि आफादनिफ्राय जेबो हेफाजाब मोनाखै। जेचेबां फिन एबा थुलुंगा मोनदों बिखौ गुबुन हारियासो थियै होबोदों। थेवबो आं बुंनो नांगोन आंनि आइआ जेब्लाबो आइ जानानै थागोन।

दानि गोदान सुबुंआ गोदान सानश्रीजों मा मा गोदान हाबाफारि लादों आं मिथिया। थेवबो थांना थानाय सानफोराव इसेब्लाबो आंनि जीउमाया बर' सुबुंनि देंखोनि थाखाय मावनो नाजागोन।

गोजोनथों (धन्यबाद) - मुश्री कनकलाल स्बर्गीयारी।

(थांनाय 11-05-2013 खालाराव बि लिरनायखौ बिथांनिफ्राय लानाय जादोंमोन)

(थांनाय 2016 मायथाइनि, डिछेम्बर दाननि 28थि खालारनि फुं बिलिआव बिथां मुश्री कनकलाल स्बर्गीयारीआ रुंसारी जालाङो)

* * * * * * * * *