लिः- मुश्री कल्याण स्बर्गीय़ारी
आं मोनसे समाव भारतनि गुबुन गुबुन जायगाफोरखौ नाइगिदिंनो जोबोत गोसो जायोमोन। जेबो जाहोन गैयालासिनो ओरोइनो गिदिंगारनो थाखाय रां फोजोबगारनोबो लुगैयामोन। नाथाइ बारा साननांगौ जायाखिसै। दानि गोदान टेकन’ल’जिजों गोरोबनो हानाय बाइदि जोंखौ आखाफाखा खालामनो थाखाइ सरखारा भारतनि दाब दाब जायगायाव त्रेइनिंनि थाखाइ खनले खनले थिनहरबोदों। बिबाइदि त्रेइनिंनिफ्राइ सरखारा साबसिन गोरों गोरा आरो आखाफाखा मानसि मोननो हायो। त्रेइनिंनिफ्राइ मोननाइ गासै गियाना नाथाइ जोंनि आंगो गिय़ान जानानै थालाङो। बेवहाइ आं जाइगा दाबसेआव थांना नुनो मोननानै आंनि गावनि साननायखौसो लितनो नाजादों।
खेबसे त्रेइनिंनि थाखाइनो एप्रिल दानाव पाञ्जाबनि सण्डिगड़ महानोगोरनि महालिसिम थांनांगौ जादोंमोन। दिल्लीनि पाहारगन्जनि आइ एस बि टिनिफ्राइ बाछजों 6 घण्टानि लामा। लामायाव जेरावबो हाजो नुनो मोनाखै। हारियाना हादोदनि गेजेरजों थांनांगौ जायो। लामायाव आमबालानि मोनसे हतेलाव बाछ लाखिदोंमोन। हतेलाव जों जाफेरनाइ परथा दंमोन बिखौनो जानो सानबाय नाथाइ परथाजों लोगोआव थबनाय कबिनि गोरा आरो गोरान बिलाइ, गाजर बाइदिखौ गोथाङै होदोंमोन, मानसिआ बिबाइदिबो जायो होनना मिथिफेरामोन। सण्डिगड़ महानोगोराव थानांगौ दानथामाव मा जानानै थागोन बिखौसो साननानै गिनाय फैदोंमोन।
हारियाना एबा पाञ्जाब दाबनैबो जोबोत आबादनि जायगा होनना मिथिबोदों। जों थांनाय समाव दुब्लिआव बारा आबाद गैयामोन, गेजेर गेजेर गम मा़इनि आबाद नुदोंमोन। जेरावबो इसेबो दै नुनो मोनाखैमोन।
सण्डिगड़ महानोगोराव जोंनि बाछआ हाबनाइनि उनावनो आं गोसो होनाय बाथ्राया जाबाय बिनि लामानि ट्रेफिक पइण्टफोरा बांसिनानो बेंखनै बानायनाइ जेराव पुलिसनि गोनांथि थाया। बिबाइदि बेंखना गुवाहाटीआव दासो मोनफा मोननै जानो हमदों। लामा बारस’नाइनि बियो साबसिन राहा होनजायो।
सण्डिगड़ महानोगोरनि महालिआव एप्रिल दाननि गेजेरनिफ्राइ जुलाइ दाननि गेजेरसिम दानथाम सम थानांगौ जादोंमोन। बि समानो सण्डिगड़ महानोगोरनि दुंहावसिन सम। फुं बेलानि उनाव जेब्लाबो 40 डिग्री दुंहाव जायो। अखा हाब्लाबो इसेल’ हाज्राङो। मिथिनो मोननाय बाइदिब्ला पाञ्जाबाव बोसोराव 10 सेःमिः अखा हाय़ो नाथाय असमाव 90 सेःमिः अखा हायो। जोंनिआव अखा हानानै जायगाफोरा दैजों बुंसारनानै जानाय जाल्लाफोरखै बिय़ाव नुनो मोना। गामिनि लामाफोराबो हाब्रु जानांगौ गैया। ननि भिथाफोरा 6 इञ्छिनि बारा गोजौ नङा होनजायो। सण्डिगड़ महानोगोरा मोनसे प्लेनिं महानोगोर। गासै महानोगोरखौ माखासे सेक्तराव राननाय जादों। मोनफ्रोम सेक्तरनि गुवारा से किलोमिटार जाफ्रामो। मोनफ्रोम सेक्तराव प्राइमारी फराय़शाली, गुवार पार्क, लोगोसे सप्तायाव सानसे हाथाइ जनाय नुनो मोनो। हाथाइया गुबैय़ै मेगंनि थाखायब्लाबो गुबुन बेसातबो फानो। हाथाइ गैय़ै सानाव बि जाइगाया लांदां जानानै थायो। मोनफ्रोम सेक्तराव द'कान एबा गला थाया। द'काननिफ्राइ बेसात बायनांगौ जायोब्ला जों मोननै सेक्तर बारनानै मार्केतसिम थांनांगौ जायोमोन। मार्केतफोरा जोंनि बाइदि गावबागावनि द'कान नङा गासैबो प्लेनिं। मोनफ्रोम मार्केतजों लोगोसे कार लाखिना दोननो हानाय गुवार पार्किं सिथला। जोंनि बाइदि लामायाव कार लाखिनानै द'कानाव हाबनो हाय़ा।
सण्डिगड़ महानोगोरा हारियाना आरो पान्जाबनि राजथाउनि। गासै सण्डिगड़ महानोगोरा खावसे हारियाना आरो खावसे पान्जाबनि। सण्डिगड़ महानोगोरखौ बोखावनाय समाव सेलाइनाय जानायखाइनो बियाव दासिमबो हादतगिरिनि बेंनाय थायो।
जोंनि गुवाहाटीय़ा हाजोजों बुंनानै थानाय समाइना जाइगा नाथाय बिखौ मानसियानो गाज्रि जाहोदों। सण्डिगड़ महानोगोराव जेबो गैया नाथाइ बिखौ मानसियानो समाइना खालामदों। सण्डिगड़ महानोगोरखौ प्लेनिं खालामनाय समाव गोबां न सिफायनो गोनां जादोंमोन, बि ननि बाइ़ख्रेबनायफोरखौनो लानानै दाबसेआव र’क गारदेन बानायदों आरो बि र’क गारदेनखौनो सानफ्रोमबो रोजा मानसिया तिकेत लानानै नाइनो थाङो। सण्डिगड़नि गुबुन नायनांगौआ सुखना लेक। गुवाहाटीनि दीघलि फख्रिया नाइथावयै जाना थानाय समाव बियाव दैजों रंजानाय गोबां राहा दंमोन।
सण्डिगड़नि दानथामाव जों जेब्लाबो राजमाहनि दालिजों ओंखाम जादोंमोन, मानोना बिय़ाव मछुर दालि रावबो जाया। बिनि मानसिया ना एबा बेदर जाया नाथाइ गोबांखौनो जौ लोंनाय नुनो मोनो। दानथामाव जों खेबसे ना आरो खेबसे बेदर बेसेबा गोजाननिफ्राइ लाबोनानै जानांगौ जादोंमोन। जों गथा बुत सोमनानै गोथाङै जानायखौ नुनानै पान्जाबि मानसिया सोमो नांदोंमोन मानोना बिसोर संनानैसो जायो। सासे पान्जाबि सेंग्राय़ा जोंनो जाहोना दिन्थिनो थाखाइनो गथा बुतखौ गिसियै एवनानै ननिफ्राइ लाबोदोंमोन नाथाइ दुखुनि बाथ्रादि फुंआवनो एवनानै लाबोना़ बुतआ जों मोनाबिलिआव जानाय समाव सेवदबदोंमोन, थेवबो हागौमानि जानानै मोजां मोनदोंमोन।
सण्डिगड़नि दुंहावआव दानथाम थानायनि जोबनोसैआव हिमाछल प्रदेशनि छिमलानि गुसु बारखौ खेबसेबो लायाब्ला जाथारा होनजायो। सण्डिगड़निफ्राइ छिमलाया बासजों 6 घण्टानि लामा। सण्डिगड़ महानोगोरा अर बाइदि दुंहाव जाना थानाइ समाव छिमलायाव जोंनि फेब्रुवारी दान बाइदि सानदुं साइनासो मोजां मोनो। छिमलायाव बेसेबां गुसु जानो हागौ बिखौ मिथियाबालानो सानसेनि थाखाइ थांनानै मोनाना फैफिननाइ समाव जोबोत गोजां जानांगौ जादोंमोन। नुनायमानि गासैबो हाजो आरो फांसेबो दाननाय नुनो मोनै अगरु दंफांजों बुंफबनानै थानाय छिमलाया थारैनो सोमखोर आरो समाइना।
महालिआव दानथाम थानानै बिनि क्रिकेत गेलेग्रा स्तेडिय़ामखौ मखआब्ला जानाय नङा। जों थानाइनिफ्राइ 2 किःमिः गोजानाव थानाइ सान हर गेलेजाग्रा बि स्तेडियामा बेसेबा लांदां जाइगायाव मोनसे फिसा स्तेडियाम होनजायो।
सण्डिगड़निफ्राइ फैफिननाय समाव दिल्लीनिफ्राय गुवाहाटीसिम राजधानी एक्सप्रेस ट्रेइनाव बेदर जागोनना निरामिस जागोन सोंदोंमोन आरो आं जेब्लाबो निरामिस जादोंमोन मानोना दानथामाव ना बेदर जायाब्लाबो इसेबो लोरबां जानाय मोनाखैमोन बिदिब्ला मानोथो जानांगौ।
