आर'नाइ

 

       लिः- मुश्री कल्याण स्बर्गीय़ारी

      बोरमा शोदोबखौ खोनाब्लानो बइबो मिथिगौ। बोरमानि मेलेमा जेब्लाबो इसेल’ होनना बइबो सानो, बिनिखाइनो मेलेम गैय़ै मानसिखौ बोरमा होनना राइनाय़बो खोनानो मोनो। मेलेम गैय़ाब्लाबो बोरमाय़ा जोंनो गाइखेर होय़ो आरो गावनि जीउखौ गारनानै बेदर जाहोय़ो। बुहुमनि रोजा रोजा मानसिय़ा बोरमाजोंसो थांनानै दङ। बोरमाय़ा जोंनि जीउनि जेबो नङा होननो हानाय़ गोहो आंहा गैय़ा। बर’आ बांसिन अ’मा फिसिय़ो, नाथाय़ जोंहानि न’आव बांसिन बोरमाय़ा जाय़गा मोनदोंमोन।

      आफाय़ा स्कुलाव फराइदोंमोनब्लाबो साख्रिआव हाबाखैमोन, आबाद मावनाय़ाव गोसो होदोंमोन। आं उन्दैनिफ्राइनो नुबोदों आबाद मावनो थाखाइ जोंहा जेब्लाबो सासेब्लाबो हावलाइ लाबोदों। आं उन्दैआव सासे हावलाइआ जोंहानि न’आव गोबां सम थादोंमोन। बिय़ो जोंनिनो गोजाम सोमोन्दोनि मानसि। मुङा बिनि बोरमा। बोरमा होनब्लानो बिखौ बइनो मिथिगौ। गुबुन माबाफोर मोजां मुं दङना गैय़ा आं दासिमबो मिथिय़ा। बोरमा मुंखौ सोर दोनखो बिखौबो आं मिथिय़ा। आफानिख्रुइ उन्दैखाय़ आं दादै एबा बोरमा दादै होनना गाबज्रिय़ोमोन। बोरमा दादैखौ आं जेब्लाबो बावनो हाय़ा। उन्दैनि गोबां सम आं बोरमा दादैखौ मोनदोंमोन। खामानिय़ानो बिनि धोरोम। रावजोंबो नांलाइनाय़ गैय़ै, एना एनि गैय़ै, गोहो गोनां बोरमा दादैय़ा गावनो सासे बिदिन्थि। गोबां बोसोर जाबाय़ बोरमा दादैनि आं जेबो खौरां मोनाखै।

      बोरमा दादैनि खाइसे फिसा जाथाय़खौ आंहा दासिमबो गोसोआव दङ। बिय़ो गाव मावनो साननाइ खामानिखौ मावना दिन्थिना जोबोत मोजां मोनोमोन। खेबसे जोंहानि न’आव खेबजां फाल्लौ(बानलु) बुर्जाय़ैनो थाइदोंमोन। फाल्लौखौ नुनानै न’नि साफ्रोमबो हागौमानि जानो नाजाय़ोमोन। आं खेबगासे जानानै गाबनांगौ जानाय़ समाव बोरमा दादैय़ा खेबजां फाल्लौखौ बांसिन जाना दिन्थिनाय़ा जेब्लाबोनि जाथाय़मोन। खेबजां फाल्लौ जानो हानायखाइनो जोंबो जोबोत बोलो गोरा, गोहो गोरा होनना सानोमोन। हाल एवनाइ जाय़गाय़ाव आंबो गेजेर गेजेर जानाइ हैय़ोमोन। साननो गोनांदि आं बोरमा दादैखौ हाल लाखिनानै ज’ना थानाय़ नूनो मोनग्रा जाबाय़। बोरमा दादैय़ा नाथाय़ खामानि गारग्रा मानसि नङा। हाल एवनानै मानसिय़ा मेङो, लोगोसे बिय़ो दिनै सेंग्रा उन्दैबो नङा, बिहाबो मोनसे गावनि न’खर दङ, न’खरनि बाथ्राफोरखौ साननानैबो बारा मेंनो हागौ, बिनिखाइनो जानो हागौ हाल थिलिआवनो दसे जिराइदों। बाथ्राय़ा नाथाय़ आं साननाइ बाइदि नङा। हाल लाखिनानै दसे गोबाव ज’ना थानाय़ा दादैनि हुदा बाइदि जाबाय़। दब्लाइसेनि जाय़गाय़ाव दब्लाइनै एवनानै गोग्गा खालामग्रा दादैय़ा बिबाइदि जानो हाय़ा। हाल थिलिआव दसे जिराइनाय़खौ मानो जिराइदों होनना सोंनो हानाय़ गोहोबो आंहा गैय़ा। नाथाय़ बाथ्राखौ सानसे आफाय़ा सोंमारबाइ। फिनाव मिथिनो मोनबाइदि बाराद्राइ उदै सानाय़नि थाखाइसो बिय़ो दसे सम हाल थिलिआव ज’ना थानांगौ जाय़ो। बाथ्राखौ मिथिनो बारा सम नांगौ जाय़ाखिसै। बिखालिनो आफाय़ा गासै खेबजां फाल्लौनि बिफांखौ दानस्रांजोबदोंमोन आरो उदै सानाय़ाबो थाबैनो हामदोंमोन।

      बोरमा दादैनि गुबुन मोनसे जाथाय़ा जोंनि गामिनि जारिमिन। 1982 माय़थाइनि बाथ्रा, बि समाव जोंनि गामिआव सिखाउनि खाउनाइ मावथाय़ा बारा जादोंमोन। हराव नेग्राफोरा गामिनि फारसेथि थांब्ला गुबुन फारसेथि सिखाउ हाबोमोन। गामिनि सिगांथिं नेब्ला उनथिं सिखाउ थाखोमाना थाय़ोमोन आरो उनथिं नेब्ला सिगांथिं। बैबो राहा नागिरनाइनि उनाव सिखाउ नेनाय़ फारिखौ सोलाइनाय़ जादोंमोन। गोदान फारि बाइदिब्ला गामिनि सिगांथिं सानैसोआ नाइथिलांनाइ समाव उनथिंबो फालोसेआ सिखाउखौ जमनानै थादोंमोन। बि फारिय़ा थारैनो मोजां खामानि होदोंमोन। जेरै साननाइ एरै खामानि, सिखाउआ फान्दोआव गोलैदोंमोन। साथाम शिखाउआ गामिनि उनथिं खारनाइ समावनो उनथि नेग्राफोरा बिसोरखौ होसोदोंमोन। सेरखाइ बेरखाइ खारनाइ साथाम सिखाउनि सासेखौ होसोदोंमोन बोरमा दादैआ। बेसेबा गोजान होसोनाइनि उनाव बोरमा दादैआ सिखाउखौ हार्सिंनो हमदोंमोन। कर्टनि बिसाराव सिखाउआ गोमानाइ बोरमाखौ नागिरना थांनाइआवनो सिखाउ होनना हमदों होननासो दाय़ होफिनदोंमोन, नाथाय़ बिसाराव सिखाउआ देरहानो हाय़ाखिसै। बैदिननिफ्राइ दिनैसिम सिखाउ सोदोबखौ जोंनि गामिआव खोनानो मोनाखै। आं बोरमा दादैखौ जेब्लाबो गोसोखाङो आरो साननांगौ जाय़ोदि मानसिनि मुंजों नङा गावनि खामानिजोंसो मोजां मानसि जानो हाय़ो।